कांग्रेसले टुंग्यायो काठमाडौंका उम्मेद्वार, गगन ४ बाटै लड्ने

नेपालभ्युज

काठमाडौं। नेपाली कांग्रेसले आफ्नो भागमा परेका काठमाडौं जिल्लामा प्रतिनिधिसभातर्फको उम्मेदवार टुंगो लगाएको स्रोतले जनाएको छ। टिकटको निर्णय भइसकेको छ तर उम्मेदवारले टिकट बुझिनसकेको बुझिएको छ।

कांग्रेस संसदीय बोर्डको जारी बैठकले काठमाडौैंको उम्मेदवार टुंगो लगाएको हो।

जसअनुसार महामन्त्री गगन थापा काठमाडौं ४ बाट उम्मेदवार बन्नेछन्। काठमाडौंमा कांग्रेसले १० निर्वाचन क्षेत्रमध्ये ६ क्षेत्रमा उम्मेद्वार दिन लागेको हो।

कांग्रेसले यसपटक पनि पुरानो उम्मेदवार दोहोर्‍याएको छ। कांग्रेस यसपटक काठमाडौं-३ मा सन्तोष चालिसे र काठमाडौं-५ मा प्रदीप पौडेललाई उम्मेदवार बनाउने भएको छ।

चालिसे गोकर्णेश्वर नगरपालिकाका पूर्व मेयर हुन् भने पौडेल कांग्रेसका केन्द्रिय सदस्य हुन्। २०७४ सालको चुनावमा पौडेल गण्डकी प्रदेशसभाको चुनावमा तनहुँ २ ख बाट पराजित भएका थिए। गठबन्धनमा कांग्रेसको भागमा काठमाडौंको निर्वाचन क्षेत्र १, ३, ४, ५, ६ र १० परेको थियो।
यी हुन् कांग्रेसका उम्मेदवार
काठमाडौं–१ प्रकाशमान सिंह

काठमाडौं–३ सन्तोष चालिसे

काठमाडौं–४ गगन थापा

काठमाडौं–५ प्रदीप पौडेल

काठमाडौं–६ भीमसेनदास प्रधान

काठमाडौं–१० राजेन्द्र केसी