महिला प्रहरीसँगको दोस्तीलाई लिएर दुई सिपाहीबीच गोली हानाहान

नयाँ दिल्ली। भारतको उत्तर प्रदेशमा महिला प्रहरीसँग को नजिक हुने भन्ने विषयमा दुईजना प्रहरीबीच गोली हानाहान भएको छ । बरेली जिल्लाको एक पुलिस थानामा तैनाथ महिला प्रहरी जवानसँगको मित्रतालाई लिएर २ जना सिपाहीले सरकारी पेस्तोल चलाएको एनडीटीभीले जनाएको छ ।

महिला प्रहरीको विषयमा दुई जना सिपाहीबीच पहिलेदेखि नै मनमुटाव रहेपनि पछिल्लो पटक गोली हानाहान गरेको गरेको खबरमा उल्लेख छ । गोली चले पनि दुवैलाई लागेको भने छैन । मङ्गलबार घटना सार्वजनिक भएपछि बरेली जिल्लाका प्रहरी प्रमुखले थानाका प्रमुखसहित पाँच जनालाई अनुशासनको कारबाही गर्दै जिम्मेवारीबाट हटाएका छन् ।

बरेलीका प्रहरी प्रमुख सत्यार्थ अनिरुद्र पंकजले तुरुन्तै घटनाको जाँच गराएको र थानाका इन्सपेक्टरसहित पाँच जनालाई निलम्बन गरेको जानकारी दिएका छन् ।

महिलासँगको मित्रतासँगै उक्त प्रहरी चौकीमा अवैध कमाईको बाँडफाँटलाई लिएर पनि बेला बेला मनमुटाव हुने गरेको जनाइएको छ ।