काठमाडौं। काठमाडौं महानगरपालिकाका प्रमुख बालेन्द्र शाहले स्वास्थ्यमन्त्री भवानीप्रसाद खापुङसँग भेटवार्ता गरेका छन् । सरकारी अस्पतालको सेवाबारे जनताबाट आएका गुनासो सुनाउन मेयर शाह बिहीबार स्वास्थ्य तथा जनसंख्या मन्त्रालय पुगेका हुन् ।
स्वास्थ्यमन्त्री खापुङका प्रेस सल्लाहाकार केदार प्रसाद गौतमका अनुसार मेयर शाहले स्वास्थ्य क्षेत्र सुधारका लागि मन्त्रीको ध्यानाकर्षण गराएका छन् ।
उनले भने- ‘मेयर शाहले सरकारी अस्पतालमा सेवा सर्वसुलभ भएन। सरसफाइ भएन र बिरामी र आफन्तलाई गर्ने व्यवहार पनि राम्रो भएन भन्ने गुनासो आएकोबारे मन्त्रीलाई जानकारी गराउनु भएको छ । मन्त्रीलाई अस्पतालको निरीक्षणका लागि समेत आग्रह गर्नुभएको छ ।’
मन्त्री खापुङले यसअघि नै सरकारी अस्पतालका निर्देशकलाई स्वास्थ्य सेवा सर्वसुलभ र व्यवस्थित बनाउन निर्देशन दिइसकेको जानकारी गराएका थिए ।
भेटमा स्वास्थ्य राज्यमन्त्री हीराचन्द्र केसी, स्वास्थ्य मन्त्रालयका सचिव दोय देवकुमारी गुरागाईं र डा. रोशन पोखरेल, स्वास्थ्य सेवा विभागका महानिर्देशक डा. दीपेन्द्ररमण सिंह, वीर अस्पतालका निमित्त प्रशासकीय अधिकृत डा. भूपेन्द्रकुमार बस्नेत, प्रसूति तथा स्त्री रोग अस्पतालका निर्देशक डा. अमिरबाबु श्रेष्ठलगायत उपस्थित थिए।
Facebook Comment
Comment