सुरक्षित हवाई यात्रा सुनिश्चित गर्न राष्ट्रपतिद्वारा सम्बद्ध निकायको ध्यानाकर्षण

राष्ट्रपति विद्यादेवी भण्डारीले सुरक्षित हवाई यात्रा सुनिश्चित गर्न सम्बद्ध निकायको ध्यानाकर्षण गराएकी छन्।

नेपालभ्युज

काठमाडौं। राष्ट्रपति विद्यादेवी भण्डारीले सुरक्षित हवाई यात्रा सुनिश्चित गर्न सम्बद्ध निकायको ध्यानाकर्षण गराएकी छन्।

आइतबार भएकाे तारा एयरकाे विमान दुर्घटनामा ज्यान गुमाएकाहरुप्रति श्रद्धाञ्जली व्यक्त गर्दै राष्ट्रपति भण्डारीले सुरक्षित हवाई यात्रा सुनिश्चित गर्न संस्थागत एवं प्राविधिक सुधारका लागि सम्बद्ध निकायको ध्यानाकर्षण गराएकी हुन्।

आइतबार बिहान पोखराबाट जोमसोमका लागि उडेको तारा एयरको ट्वीनअटर विमान सम्पर्कविहीन भएको थियो। सोमबार बिहान मुस्ताङको थासाङ गाउँपालिका–२ को सानोसरे भन्ने ठाउँमा दुर्घटनाग्रस्त अवस्थामा भेटिएको थियो।

चालक दलका तीन सदस्य र १९ यात्रु लिएर पोखराबाट बिहान ९ः५५ बजे जोमसोमका लागि उडेको तारा एयरको ९ एनएइटी विमान आइतबार बिहान १०ः०७ बजे जोमसोम विमानस्थलको टावरबाट सम्पर्कविहीन भएको थियो। विमानमा सवार सबैको मृत्यु भएको छ।