गौतमबुद्ध अन्तर्राष्ट्रिय विमानस्थलमा जजिरा एयरवेजले नियमित उडान गर्ने

काठमाडौं। राष्ट्रिय गौरवको आयोजनाका रूपमा रहेको गौतमबुद्ध अन्तर्राष्ट्रिय विमानस्थलमा कुवेतकोे जजिरा एयरवेजले पहिलो व्यावसायिक उडान भर्ने भएको छ।

जजिराले आगामी २ जेठ (बुद्ध जयन्ती)देखि नियमित उडान गर्नेगरी नियामक नेपाल नागरिक उड्डयन प्राधिकरणमा निवेदन दिएको छ।

प्राधिकरणका उपमहानिर्देशक देवचन्द्रलाल कर्णका अनुसार जजिराले दैनिक एक नियमित उडान गर्नेगरी निवेदन दिएको छ। जजिराले कुवेत–भैरहवा–कुवेत सिधा उडान गर्नेछ। जजिराले हाल काठमाडौंमा समेत नियमित उडान गरिरहेको छ।

हालै यान्त्रिक परीक्षण उडान ‘क्यालिब्रेसन फ्लाइट’ सम्पन्न भएको गौतमबुद्ध विमानस्थलमा आगामी १ वैशाखमा नेपाल वायुसेवा निगम (नेपाल एयरलाइन्स)ले परीक्षण उडान गर्नेछ।

उपमहानिर्देशक कर्णले गौतमबुद्ध विमानस्थलमा १ वैशाखमा परीक्षण उडान भएपछि ७ वैशाखदेखि व्यावसायिक अन्तर्राष्ट्रिय उडान खुला गरिने जानकारी दिए। उनले व्यावसायिक उडानका लागि आवश्यक सम्पूर्ण तयारी पूरा भएको पनि बताए।