खैरेनीटार-भिमाद सडकखण्ड दैनिक ९ घण्टा अवरुद्ध हुने

नेपालभ्युज

खैरेनीटार-भिमाद सडकखण्ड दैनिक ९ घण्टा अवरुद्ध हुने

तनहुँ। खैरेनीटार-भिमाद सडकखण्ड दैनिक ९ घण्टा अवरुद्ध हुने भएको छ। सडक डिभिजन कार्यालय तनहुँले उक्त खण्ड मर्मतका लागि दैनिक बिहान ८ बजेदेखि बेलुका ५ बजेसम्म सडक बन्द गर्न लागेको हो।

उक्त सडकखण्डको दोभानमा सडक स्तरोन्नति गर्ने क्रममा हाल रहेको सडकलाई चौडाइ गर्नुपर्ने र त्यसका लागि केही समय सडक बन्द गर्दै निर्माण गर्नुपर्ने निमित्त डिभिजन प्रमुख कल्याण खड्काले जानकारी दिए।

“निर्माण कार्य गर्दा दुर्घटना घट्न सक्ने सम्भावना देखिएकाले सडक चौडा पार्ने कार्य सम्पन्न नहुञ्जेल सडक अवरुद्ध हुनेछ”, उनले भने। सडक निर्माणका क्रममा सडक अवरुद्ध भए पनि आवश्यकताअनुसार करिब १ घण्टा बन्द हुने तथा ३० मिनेट सडक खोलिनेछ।

उक्त सडकखण्ड गत साउनदेखि स्तरोन्नति शुरु गरिएको हो। उक्त कामका लागि कार्यालयले काठमाडौँस्थित श्री महालक्ष्मी/हिमाली जेभीबीच सम्झौता गरेको थियो। खैरेनीटार-भिमाद-भुमरीघाट-कावासोती सडकको शुक्लागण्डकी नगरपालिका र म्याग्दे गाउँपालिकाको पाँच किलोमिटर सडक फराकिलो बनाएर नयाँ कालोपत्रे गरिनेछ।

सात करोड ४५ लाख २१ हजार रुपैयाँ लागतमा उक्त कामको ठेक्का लागेको छ। गत वैशाख १३ गते एमएस महालक्ष्मी हिमाली जेभी काठमाडौँसँग निर्माण सम्झौता भएको थियो तर वर्षा र कोरोनाको कारण समयमै काम शुरु हुन सकेको थिए। १३ कात्तिक २०७९ सम्म उक्त काम सम्पन्न गर्ने म्याद रहेको छ।

खैरेनीटार-भिमाद सडकको ठाउँ-ठाउँमा कालोपत्रे उप्किएर ठूला-ठूला खाल्डा बनेका छन्। खाल्डामा वर्षाको पानी जम्दा पोखरी बनेको छ। शुक्लागण्डकी नगरपालिका-७ स्याउलीबजार र म्याग्दे गाउँपालिका-५ थाङ्दीदेखि भिमादको पुलसम्म सडकको दुरवस्था छ। कतिपय स्थानमा सडकको कालोपत्रे देख्नै मुस्किल हुने अवस्थामा पुगेको छ। भिमाद नगरपालिकाको प्रवेशद्वारमा पनि सडकको हालत बिजोग छ।

जिल्लाको भिमाद नगरपालिका, म्याग्दे गाउँपालिका, ऋषिङ गाउँपालिका र घिरिङ गाउँपालिकाको प्रमुख सडक यही हो। नवलपुर, पाल्पा र स्याङजाका विभिन्न स्थानका सवारी र यात्रु यही सडक भएर आवतजावत गर्ने गर्दछन्।


Comment

Leave a Reply

Your email address will not be published. Required fields are marked *

थप समाचार

लोकप्रिय (यो साता)

Copyright © 2024 Digital House Nepal Pvt. Ltd. - All rights reserved