रसुवा नाकाबाट नेपाल भित्रियो विद्युतीय माइक्रोबस

काठमाडौं। नेपालको उत्तरी नाका रसुवागढीबाट विद्युतीय माइक्रोबस आयात गरिएका छन् । शहरी क्षेत्रलाई केन्द्रित गरी व्यवसायीबाट आयात गरिएका १२ सिट क्षमताका २२ वटा माइक्रोबस बुधबार साँझसम्म नेपाल भित्रिएका हुन् ।

चीनबाट दिन प्रतिदिन सवारी साधन आयात भइरहेका र दशैँलगत्तै भित्रिएका माइक्रोबसको भन्सार प्रक्रिया पूरा गरी गन्तव्यतर्फ पठाइसकिएको रसुवा भन्सार कार्यालयका सूचना अधिकारी नरेन्द्रप्रसाद चौधरीले जानकारी दिए। दशैँअगावै १०० विद्युतीय कार आयात भएका थिए भने पछिल्लो समय माइक्रोबस आयात हुने क्रम बढेको भन्सार कार्यालय टिमुरेले जनाएको छ ।

शहरी क्षेत्र केन्द्रित गरी आयात गरिएका माइक्रोबसका पांग्रा होचा भएका कारण कच्ची सडकमा गुडाइ काठमाडौँ लान निकै चुनौती रहेको सवारी चालकले प्रतिक्रिया दिएका छन् । रसुवागढीदेखि गल्छीसम्मका अधिकांश सडकमा बढी खाल्डाखुल्डी भएकाले साना र होचा सवारी साधन सहजरूपले लैजान बढी असहज हुने गरेको बताइन्छ ।

दशैँ अगाडि आयात भएका सानाखालका केही सवारी साधन भने मालधनी एवं उसका प्रतिनिधि नपुग्दा भन्सार हातामा थन्किएका छन् । विद्युतीय सवारी साधनको आयातले प्रदूषणको न्यूनीकरण एवं शहरी क्षेत्रमा वातावरणको स्वच्छता बढ्ने र पेट्रोलियम पदार्थबाट चल्ने यात्रुबाहक साधन क्रमिक रूपले हट्दै जाने बताइएको छ ।

सवारी साधनमा रहने ब्याट्री एक पटक चार्ज गरेपछि चार घण्टासम्म पुग्ने भएकाले बिनाआवाज शहरी क्षेत्रको यात्रा अत्यन्तै सहज हुने जनाइएको छ ।

आर्थिक वर्ष २०७७/७८ को साउनदेखि हालसम्म ९०० भन्दा बढी सानाठूला सवारी साधन आयात भएको भन्सार कार्यालय टिमुरेले जनाएको छ ।

आयात भएका सवारी साधनबाट नियमानुसार भन्सार शुल्कबापत ६५ करोड रुपैयाँभन्दा बढी राजस्वसमेत दाखिला भइसकेको भन्सार अधिकारीले बताएका छन् ।