भौतिक रुपमा कक्षा सञ्चालन गर्न अखिल क्रान्तिकारीको माग

काठमाडौं। नेत्रविक्रम चन्द ‘विप्लव’ नेतृत्वको नेकपा निकट अखिल (क्रान्तिकारी) ले अनलाइन शिक्षाको नाममा विद्यार्थी लुटिएको भन्दै तत्काल भौतिक कक्षा सञ्चालन गर्न माग गरेको छ।

शुक्रबार काठमाडौंमा आयोजित पत्रकार सम्मेलनमा अखिलले वैज्ञानिक समाजवादी शिक्षा वैज्ञानिक समाजवादी व्यवस्थामा मात्रै सम्भव भएकाले समाजवादका लागि एकीकृत हुन अपील गरेको छ। पत्रकार सम्मेलनमा नवनिर्वाचित अध्यक्ष प्रकाश शाहीले सम्मेलनले २१औं राष्ट्रिय सम्मेलनबाट प्रस्तावित वैज्ञानिक समाजवादी शिक्षाको प्रारम्भिक खाका प्रस्तुत गरेको जानकारी दिए। सरकारले जनताका कुनै समस्या समाधान नगरेको आरोप लगाउँदै मुठ्ठीभरका मान्छेले सरकारबाट लाभ लिइरहेको आरोप उनले लगाए।

उनले भौतिक सुविधाको अभावमा दुर्गम क्षेत्रका विद्याथीको पढाइको स्तर खस्किँदै गएको र सरकारले यसलाई गम्भीरताका साथ नलिएको उनको भनाइ थियो।

उनले देश कोरोना संक्रमित सबै नागरिकहरुलाई निःशुल्क उपचारको व्यवस्था गर्नुको साथै कोरोना खोपको अनिवार्य व्यवस्था गर्न सरकारसँग माग गरे। सम्मलेनले प्रकाश शाहीको अध्यक्षतामा ११३ सदस्यीय केन्द्रीय समिति गठन गरेको छ।