सात प्रदेशको सनाखत

एमालेका ५२ सांसद नेकपा ‘एस’मा

७० जिल्ला र सातै प्रदेशको सनाखतको अन्तिम नतिजा आउन समय लाग्ने

नेपाल भ्यूज

एमालेका ५२ सांसद नेकपा ‘एस’मा

काठमाडौं। विभाजित दलमा जान जनप्रतिनिधिहरूलाई दिएको समयावधि आज सकिएको छ।

नेपालको संविधानको धारा ११४ को उपधारा(१) बमोजिम मन्त्रिपरिषद्को सिफारिसमा राजनीतिक दलसम्बन्धी (दोस्रो संशोधन) अध्यादेश, २०७८ जारी भएसँगै नेकपा एमालेबाट विभाजित भएर नेकपा ‘एकीकृत समाजवादी’ र जनता समाजवादी पार्टी (जसपा)बाट लोकतान्त्रिक समाजवादी पार्टी (लोसपा) निर्वाचन आयोगमा दर्ता भएका थिए।

साथै नेकपा एमाले र जसपाका सांसद र केन्द्रीय सदस्यहरूले सनाखत गरेसँगै निर्वाचन आयोगले ९ भदौमा नेकपा ‘एकीकृत समाजवादी’ र लोकतान्त्रिक समाजवादी पार्टी (लोसपा) राजनीतिक दल दर्ताको प्रमाणपत्र दिएको थियो।

अध्यादेशको दफा ३३ को ‘२(क) उपदफा (२) बमोजिम छुट्टै नयाँ दल गठन भएकोमा त्यस्तो दल गठन हुनुभन्दा तत्काल अघिको दलको तर्फबाट निर्वाचित प्रदेश सभा सदस्य वा स्थानीय तहका सदस्य त्यसरी नयाँ दल गठन भएको २१ दिनभित्र त्यस्तो नयाँ दल प्रवेश गरेमा त्यस्ता सदस्यले दल त्याग गरेको मानिने छैन’ भनी व्यवस्था गरिएको थियो।

सोहीअनुरुप निर्वाचन आयोगले नयाँ दल गठन भएको मितिले २१ दिन (भदौ २२ गते) भित्र प्रदेश सभाका सदस्यले सम्बन्धित प्रदेश निर्वाचन कार्यालयमा र स्थानीय तहका सदस्यले सम्बन्धित जिल्ला निर्वाचन कार्यालयमा कार्यालय समयभित्र स्वयं उपस्थित भई सनाखत गर्न/गराउन निर्देशन दिएको थियो।

नेकपा एमाले जनप्रतिनिधिले २१ दिनभित्र नेकपा (एकीकृत समाजवादी) प्रवेश गर्न समय पाएका थिए। यसरी प्रवेश गरेका जनप्रतिनिधिलाई नेकपा एमालेले कुनै कारबाही गर्न नपाउने संसद् सचिवालयका प्रवक्ता रोजनाथ पाण्डेले बताए।

तर २१ दिनपछि एमालेबाट एकीकृत समाजवादीमा प्रवेश गरे एमाले त्याग गरेर आएको मानिने भएकाले उसलाई एमालेले कारबाही गर्न सक्नेछ। त्यस्ता जनप्रतिनिधिहरूलाई पदबाट समेत हटाउन सक्नेछ।

नेकपा एमालेका केन्द्रीय सदस्य एवं प्रचार विभाग सदस्य सूर्य थापाका अनुसार प्रदेश १ मा नेकपा एमालेका ५१ सांसद रहेकामा १० जना नेकपा (एकीकृत समाजवादी) पार्टी प्रवेशका लागि सनाखत गरेका छन्।

त्यस्तै प्रदेश २ का २१ मध्ये १३ जना, बागमती प्रदेशका ५८ मध्ये १२ जना, लुम्बिनी प्रदेशका ४१ मध्ये १ जना, कर्णाली प्रदेशका २० मध्ये ३ जना र सुदूरपश्चिम प्रदेशका २५ भध्ये १३ जना सांसद नेकपा (एकीकृत समाजवादी) प्रवेश गरेका छन्। गण्डकी प्रदेशका २७ जना भने नेकपा एमालेमै छन्।

साथै संघीय संसदका २९ सांसदले नेकपा (एकीकृत समाजवादी)मा सनाखत गराइसकेका छन् भने पाँच सदस्यको सनाखतको प्रक्रिया रोकिएको छ।

प्रदेशमा

एमाले            (सनाखत अघि)          नेकपा (एकीकृत समाजवादी)  प्रवेश गरेका           एमालेमा बाँकी

प्रदेश १                     ५१                                         १०                                                          ४१
प्रदेश २                     २१                                         १३                                                            ८
बागमती                    ५८                                         १२                                                           ४६
गण्डकी                    २७                                         ०                                                              २७
लुम्बिनी                     ४१                                           १                                                             ४०
कर्णाली                     २०                                          ३                                                              १७
सुदूरपश्चिम                २५                                         १३                                                             १२
जम्मा                        २४३                                      ५२                                                             १९१

निर्वाचन आयोगका सूचना अधिकारी सूर्यप्रसाद अर्यालका अनुसार ७० वटा जिल्ला र ७ प्रदेशको सनाखतको अन्तिम नतिजा आउन अझै केही दिन लाग्छ।

“आज साँझसम्म सनाखत गराएपछि त्यो सनाखत प्रदेश निर्वाचन कार्यालय र जिल्ला निर्वाचन कार्यालयले खामबन्दी गरी पठाउँछ,” उनले भने, “नजिककाले भोलि र टाढाका निर्वाचन कार्यायलले दुई/तीन दिनमा सनाखत पठाउलान्। त्यो संकलनपछि नै निर्वाचन आयोगले निर्णय गर्ने भएकोले अन्तिम नतिजा आउन केही दिन लाग्छ।”

तपाईंलाई नेपाल भ्यूज कस्तो लागिरहेको छ ? तपाईंले हामीलाई फेसबुक, युट्युब, ट्विटर, टिकटक मार्फत् सल्लाह, सुझाव र प्रतिक्रिया दिन सक्नुहुन्छ ।

Leave a Reply

Your email address will not be published. Required fields are marked *

सम्बन्धित

ट्रेन्डिङ

Copyright © 2021 Digital House Nepal Pvt. Ltd. - All rights reserved