फुटपाथमा पार्किङ छिचोल्दै सकसपूर्ण पैदलयात्रा (फोटोहरु)

काठमाडौं। केही वर्षअघि काठमाडौंको सडक फराकिलो बनाउने अभियान चलाइयो। बाटो विस्तारको क्रममा सडक छेउका घरमाथि डोजर चलाइयो। भत्काइएका घरकाधनीले मुआब्जा लागि संघर्ष गर्नुपर्‍यो। कतिपयले घरधनीले त अझै पनि मुआब्जा पाइसकेका छैनन्।

बाटो फराकिलो भयो, दुवैतिर फुटपाथ बन्यो। गाडी र पैदलयात्रु दुवैलाई सहज भयो। तर, यो अवस्था भने अहिलेसम्म टिक्न सकेन। धेरै ठाउँका बाटो फेरि साँघुरिएको छ। कतिपय ठाउँमा फुटपाथ छैन, भएका ठाउँमा पनि पैदलयात्रीहरू हिँड्न पाउँदैनन्।

कारण हो, सडकका दुवै किनारमा सवारीसाधन लस्करै रोकिनु। फराकिलो बाटोको फुटपाथमा छेउछेउमा मोटरसाइकल, कारको पार्किङस्थल बन्नु। परिणाम– न सडकमा सुइँसुइँती कुद्न पाएका छन्, न त पैले ठम्ठम्ती हिँड्न नै ।

नयाँबानेश्वर चोकबाट मध्यबानेश्वरतर्फ लाग्ने क्षेत्रको फुटपाथमा बिहानदेखि साँझसम्म गाडी र मोटरसाइकल पार्किङ हुन्छ।

यो एउटा उदाहरण हो। काठमाडौं उपत्यकाका अधिकांश सडक पार्किङ स्थलजस्तै लाग्छन्। पैदल यात्रुको बाटो छेकेर आवागमन अस्तव्यस्त पारिएको छ। फुटपाथमा हुने पार्किङ हटाउन महानगरको ध्यान गएको देखिँदैन।

बानेश्वर क्षेत्रमा फुटपाथ चिल्लो बनाउन ढुङ्गा छापिँदै छ। तर, छापिएपछि पैदलयात्रीहरु हिँड्न पाउँछन् या सवारी पार्किङ हुन्छन् हेर्न बाँकी छ।