संसदीय विशेष छानबिन समितिले जनार्दन शर्मासँग आज बयान लिँदै

काठमाडौं। प्रतिनिधिसभाको विशेष छानबिन समितिले निवर्तमान अर्थमन्त्री जनार्दन शर्मासँग आज (बुधबार) बयान लिँदै छ। सचिव सुरेन्द्र अर्यालले तत्कालीन अर्थमन्त्री शर्मासँग छलफल गर्ने तय भएको बताए।

समितिको मंगलबार बसेको बैठकले शर्मालाई आज बयानका लागि बोलाउने निर्णय गरेको हो। आजै समितिले पूर्वअर्थसचिवहरुसँग छलफल गर्नेछ। यसअघि समितिले अर्थसचिव र राजश्व सचिवसँग बयान लिइसकेको छ। दुवैले आरोप अस्वीकार गरेका छन्।

यसअघि मंगलबार नै शर्मासँग बयान लिने तयारी थियो। तर सीसीटीभी फुटेज नभेटिएपछि धकेलिएको हो। समितिले फुटेज मेटिएको निष्कर्ष निकाल्दै प्राविधिकमार्फत रिकभरमा जाने निर्णय गरिसकेको छ।

करको दर हेरफेर तथा बजेट निर्माण प्रक्रियामा अनधिकृत व्यक्तिको प्रवेश प्रकरणमा तत्कालीन अर्थमन्त्री शर्माले राजीनामा दिएका छन्। उनको राजीनामा अघि नै प्रतिनिधिसभाले छानबिन समिति बनाएको थियो।

सीसीटीभी फुटेज मेटिएको निष्कर्ष

विशेष छानबिन समितिले अर्थ मन्त्रालयको सीसीटीभी फुटेज मेटिएको निष्कर्ष निकालेको छ। समितिका एक उच्च अधिकारीकाअनुसार अर्थ मन्त्रालयबाट दुवै पटक आएको सीसीटीभी फुटेजमा तत्कालीन अर्थमन्त्री शर्माले अनधिकृत व्यक्तिको प्रवेश गराएर बजेटमा करका दरमा चलखेल गरेको दिनको भिडियो फेला पर्न सकेको छैन।

मन्त्रालयले हालै सीसीटीभी फुटेज १३ दिनसम्म मात्रै रहने, त्यसपछि मेटिने भनेर उपभोक्ता हित संरक्षण समितिलाई पत्र पठाएको थियो। त्यसपछि कसरी मेटियो भनेर चर्को विरोध भएको थियो।

सीसीटीभी जडान तथा सञ्चालनसम्बन्धी कार्यविधिमा सीसीटीभीबाट खिचेका दृश्यहरू कम्तीमा तीन महिनासम्म सुरक्षित रहने गरी राख्नुपर्ने व्यवस्था छ।