भारतमा मनसुनको प्रकोप : थप २६ जनाको मृत्यु

एजेन्सी। भारतमा मनसुनको बाढी र चट्याङमा परी कम्तीमा पनि २६ जनाको मृत्यु भएको छ। छिमेकी राष्ट्र बङ्गलादेशमा लाखौं मानिस यस प्रकोपको मारमा परेका अधिकारीहरूले जनाएका छन्।

भारतको उत्तरपूर्वी राज्य आसाममा पहिरोमा परी तीन जनाको मृत्यु भएको छ भने बाढीमा डुबेर ६ जनाको मृत्यु भएको प्रकोप व्यवस्थापन अधिकारीहरूले बताएका छन्।

पूर्वी राज्य बिहारमा आँधीका कारण चट्याङ लागेर कम्तीमा १७ जनाको मृत्यु भएको स्थानीय प्रकोप व्यवस्थापन मन्त्री रेणु देवीले जानकारी दिइन्। आसाम लगातार बाढीको चपेटामा परेको छ। राज्यका ३३ जिल्लाका ५ हजार १४० गाउँहरू बढ्दो पानीले डुबेका छन्।

एक लाखभन्दा बढी गाउँले राहत आश्रयमा शरण लिएका छन्। राज्य पहिलो पटक अप्रिलमा प्रभावित भएको थियो। हाल पुनः वर्षाको कारण आएको बाढीमा परी ४४ जनाको मृत्यु भएको छ।

छिमेकमा पर्ने मेघालय राज्यमा पहिरो र बगेको खोलाले सडक डुबेपछि गत बिहीबारदेखि कम्तिमा १६ जनाको मृत्यु भएको छ। मनसुन आँधीले बङ्गलादेशमा विनाशकारी बाढी पनि फैलाएको छ। लाखौं अलपत्र परेका र दर्जनौंको मृत्यु भएको छ।

आश्रयस्थलहरु प्रभावित मानिसहरूले भरिएका छन्। त्यहाँ खाना र पिउने पानीको ठूलो संकट छ। धेरैले बाढीको पानीमा आफ्नो घर गुमाएका छन्। जमालपुर जिल्लामा, एक आठ वर्षीया बालिकालाई डुबानमा परेको घरको आँगनबाट बगाएको थियो र पछि मृत फेला परेको प्रहरी अधिकारी अमिनुल इस्लामले बताए,

दक्षिणपूर्वी चटगाउँ पहाडी जिल्लाहरूमा पनि भारी वर्षा जारी रहयो जसले बन्दरगाह सहरमा जलमग्नता र पहिरोको जोखिम बढाएको छ।