नेपाली व्यवसायी अर्याललाई अमेरिकी मानार्थ विद्यावारिधि

स्यानफ्रान्सिस्को। लामो समयदेखि रियल स्टेट ब्यावसायमा संलग्न नेपाली युवा व्यवसायी अनिलबाबु अर्यालले क्यालिफोर्नियाको ओकल्याण्डस्थित लिङ्कन युनिभर्सिटीबाट मानार्थ विद्यावारिधि पिएचडी उपाधि हासिल गरेका छन्। व्यवसायी अर्यालले नेपाली समुदायमा रियल स्टेट ब्यावसायमार्फत नेपाली समुदायमा पुर्‍याएको योगदान र सहयोगको कदर स्वरूप सो पिएचडी उपाधि दिइएको युनिभर्सिटीले जनाएको छ।

हरेक विधामा उत्कृष्ट योगदान पुर्याउनेहरुलाई सो युनिभर्सिटीले  पिएचडीको उपाधि प्रदान गर्दै आएको छ। बिजनेस एडमिनिष्ट्रेशनमा मानार्थ पीएडी उपाधि प्राप्त गर्ने अर्याल पहिलो नेपाली व्यवसायी हुन। अमेरिकाको होम स्न्याप कम्पनीले गरेको सर्वेक्षणको “टप फाइप प्रतिशत“मा अर्यालको नाम प्रकाशित भएको थियो।  सोही आधारमा लिङ्कन युनिभर्सिटीले उनलाई विद्यावारिधिको लागि छनौट गरेको थियो।

पिएचडी उपाधि पाउनु गौरवको विषय भएको बताउँदै व्यवसायी अर्यालले आफूलाई यसबाट थप उत्साह र प्रेरणा मिलेको बताए। ‘‘यो मेरो व्यक्तिगत सफलता मात्र नभई नेपाल र नेपाली समुदायको कदर र सम्मान पनि हो, नेपाली समुदायको निम्ति अझ धेरै काम गर्ने प्रेरणा मिलेको छ,’’ अर्यालले भने। युनिभर्सिटी अफ स्यानफ्रान्सिस्कोका सहप्राध्यापक डा टीका लम्सालले नेपाली व्यवसायीलाई युनिभर्सिटीले डक्टरेट डिग्री प्रदान गर्नु व्यक्तिको मात्र नभई नेपाली समुदायको लागि निकै खुसी र गौरवको विषय भएको बताए।

सन् १९८७ मा गोरखामा जन्मेका अर्याल उच्च शिक्षा अध्ययनको लागि २००७ मा अमेरिकाको पश्चिम भर्जिनिया आएका थिए। उनले त्यहाँको माउन्टेन युनिभर्सिटी र पछि क्यालिफोर्निया स्टेट युनिभर्सिटी इष्टवेवाट वायोकेमेष्ट्री र बिजनेस एडमिनिष्ट्रेशनको अध्ययन पुरा गरेका गरेका थिए। सन् २०१६ देखि रियल स्टेट व्यवसायमा संलग्न अर्याल क्यालिफोर्नियामा सफल र नेपालीहरुबीच लोकप्रिय युवा व्यवसायीको रुपमा परिचित छन्।

उत्कृष्ट व्यवसायी भएबापत उनलाई सन् २०२१ मा इष्ट बे एसोसिएसन अफ रियल्टर्सले गोल्ड क्लब अवार्ड र सन् २०१८ २०२० टप प्रोड्युसर अवार्डबाट पुरस्कृत गरेको छ। अर्याल विगत ७ वर्षदेखि रियल स्टेट ब्यावसायमा संलग्न छन्।