नवयुग श्रेष्ठ बने नेपाली फुटबल टिमको कप्तान

काठमाडौं। स्टार फरवार्ड नवयुग श्रेष्ठले नेपाली राष्ट्रिय फुटबल टिमको कप्तानको जिम्मेवारी पाएका छन्। अखिल नेपाल फुटबल संघ, एन्फाले मंगलबार श्रेष्ठलाई कप्तानको जिम्मेवारी दिएको हो।

नियमित कप्तान किरण चेम्जोङसहितका खेलाडी टिमबाहिर रहेपछि नवयुगले कप्तानको जिम्मेवारी पाएका हुन्। प्रशिक्षणका दौरान मुख्य प्रशिक्षकसँग विवाद भएपछि शीर्ष ११ खेलाडी यसपटक टिममा परेका छैनन्।

नयाँ कप्तान घोषणासँगै एन्फाले एसिया कप छनोट खेल्ने नेपाली टिम घोषणा गरेर बिदाइसमेत गरेको छ। मुख्य प्रशिक्षक अब्दुल्लाह अलमुताइरीले नियमित कप्तानसहित शीर्ष १० खेलाडीलाई बाहिर राखेर एसिया कप छनोट खेल्ने टिमको घोषणा गरेका हुन्।

कुवेतमा हुने एसिया कप छनोट खेल्ने राष्ट्रिय फुटबल टिमलाई एन्फाले मंगलबार नै एक समारोहका बीच बिदाइ गरेको छ। युवा तथा खेलकुद मन्त्री महेश्वर गहतराजले खेलाडीलाई बिदाइ गर्दै उत्कृष्ट खेल प्रर्दशनका लागि शुभकामना दिए।

नेपाली टिम आज कतार उड्नेछ। एसिया कप छनोटमा नेपाल समूह ’ए’ मा रहेको छ। नेपाल रहेको समूहमा कुवेत, इन्डोनेसिया र जोर्डन रहेका छन्।

छनोट खेलहरु ८ देखि १४ जुनसम्म हुनेछन्। नेपालले ८ जुनमा जोर्डनसँग, ११ जुनमा कुवेतसँग र १४ जुनमा इन्डोनेसियासँग खेल्नेछ। हरेक समूहका शीर्ष टोली र ५ समूहको उत्कृष्ट दोस्रो टोली चीनमा आयोजना हुने एसियन कप २०२३ मा छनोट हुनेछन्।

नेपाली टोली
दीप कार्की, विशाल सुनार, टिकेन्द्र सिंह थापा, विकास खवास, विकास तामाङ, गौतम श्रेष्ठ, राजन गुरुङ, शिव गुरुङ, सुमन अर्याल, आकाश बुढा क्षेत्री, एरिक विष्ट, निरकुमार राई, पुजन उपरकोटी, रोशन राना मगर, सन्तोष तामाङ, सेन्सेहाङ आङ्दाम्बे, सुनिल बल, सुरज ज्यू ठकुरी, आयुश घलान, दर्शन गुरुङ, जर्ज प्रिन्स कार्की, मनिष डाँगी र नवयुग श्रेष्ठ।