कुन चुनाव पहिला गर्ने भन्ने विषयमा छलफल गर्न गठबन्धनको बैठक बस्दै

काठमाडौं। पालिकाको चुनाव पहिला गर्ने कि संघीय संसद्को भन्ने विषयमा छलफल गर्न सत्ता गठबन्धनमा रहेका दलहरुबीच आज छलफल हुँदैछ। सत्ता गठबन्धनमा पालिकाको चुनाव पहिला गर्ने कि सङ्घीय संसद्को भन्ने विषयमा बहस शुरु भएको छ।

सोही विषयमा थप छलफल गर्दै निष्कर्ष निकाल्ने भन्दै आज (शुक्रबार) बैठक बस्न लागेको हो। दिउँसो चार बजेका लागि सत्ता गठबन्धनको बैठक बस्ने जनाइएको छ। यसअघि बिहीबार प्रधानमन्त्री शेरबहादुर देउवासँग सत्ता गठबन्धन दल माओवादी केन्द्रका अध्यक्ष पुष्पकमल दाहाल प्रचण्ड र नेकपा (एकीकृत समाजवादी) का अध्यक्ष माधवकुमार नेपालले छलफल गरेका थिए।

छलफलमा प्रधानमन्त्री एवम् कांग्रेसका सभापति शेरबहादुर देउवाले पालिकाको चुनाव अगाडि गर्नुपर्ने प्रस्ताव राखेका छन्। तर, माओवादी केन्द्रका अध्यक्ष पुष्पकमल दाहाल प्रचण्डले वैशाख÷जेठमा संसदीय र कात्तिकमङ्सिरमा पालिकाको चुनाव गर्नु प्रस्ताव राखेका छन्।
यसअघि बिहीबार बस्ने भनिएको पाँच दलीय गठबन्धन समन्वय समितिको बैठक स्थगित भएको थियो। गठबन्धनको बैठक स्थगित भएपछि शीर्ष नेताबीच छलफल भएको थियो।