कोशीले गण्डकीलाई हरायो, एपीएफसँग कर्णाली पराजित

काठमाडौं। प्रधानमन्त्री कप टी–२० राष्ट्रिय महिला क्रिकेट प्रतियोगितामा कोशी प्रदेशले गण्डकीलाई पराजित गरेको छ ।

मूलपानी क्रिकेट मैदानमा बुधबार भएको खेलमा कोशीले गण्डकीलाई ५५ रनले पराजित गरेको हो। १०४ रनको लक्ष्यमा पछ्याएको गण्डकी १५ ओभरमा ४८ रनमा अलआउट भयो ।

गण्डकीका लागि सुमन खतिवडाले अविजित २१ रन बनाए । ५ खेलाडी डगआउट भए भने ५ खेलाडीले दोहोरो अंक बनाउन सकेनन्। कोशीका लागि रुबिना क्षेत्रीले ३, संगीता राई र अलिशा खडियाले २–२ तथा अप्सरी बेगमले १ विकेट लिए ।

पहिले ब्याटिङ गरेको कोशीले पूरै ओभर खेलेर ८ विकेट क्षतिमा १०३ रन बनायो। बिमला मलाहाले २५ र संगीता राईले अविजित २३ रन बनाए। गण्डकीका लागि कुसुम गोदार र रचना चौधरले २–२ विकेट लिए ।

५ खेलबाट ८ अंक प्राप्त गरेको कोशी दोस्रो स्थानमा छ भने ५ खेलबाट २ अंक जोडेको गण्डकी छैँटौँ स्थानमा छ।

यस्तै, कीर्तिपुरस्थित त्रिवि मैदानमा भएको खेलमा एपीएफले कर्णालीलाई ९२ रनको फराकिलो अन्तरले पराजित गर्यो।

१६१ रनको लक्ष्य पछ्याएको कर्णालीले  पूरै ओभर खेलेर ८ विकेट क्षतिमा मात्र ६८ रन बनायो। तृष्णा विश्वकर्माले १९ र गौरी बोहराले १२ रन बनाए। एपीएफका करुणा भण्डारीले ४, सुमन विष्टले २ तथा बिनु बुढा र सीता राना मगरले १–१ विकेट लिए।

पहिले ब्याटिङ गरेको एपीएफले पूरै ओभर खेलेर २ विकेट क्षतिमा १६० रन बनाएको थियो । राजमती ऐरीले ६७ र ममिता चौधरीले ६२ रन बनाएपछि एपीएफले ठूलो स्कोर खडा गरेको थियो ।

लगातार ५ खेलमा जित हासिल गरेको एपीएफ १० अंकसहित शीर्ष स्थानमा छ। लगातार पाँच खेलमा पराजित भएको अंकविहीन कर्णाली पुछारमा छ।