हमासले बन्धक बनाएका दुई इजरायली सैनिक गाजामा मृत फेला

काठमाडौं। हमासले बन्धक बनाएका आफ्ना दुई सैनिकको शव फेला परेको इजरायली सुरक्षा बल आइडिएफले जनाएको छ ।

७ अक्टोबरमा प्यालेस्टिनी अतिवादी समूह हमासले आक्रमणपश्चात उनीहरुलाई बन्धक बनाएर गाजामा लगेको थियो । इरेज क्रसिङस्थित आइडिएफ बेसमा कार्यरत हुँदा १९ वर्षीय निक बेइजर र गाजा पुलिस मुख्यालयमा कार्यरत १९ वर्षीय समन्वय र सम्पर्क अधिकारीको रुपमा रहेका रोन शेरम्यानलाई हमासले बन्धक बनाएका थिए।

दक्षिणी गाजामा उनीहरु मृत अवस्थामा फेला परेको इजरायली सेनाले जनाएको छ । ७ अक्टोबरमा भएको आक्रमणमा हमासले २४० जनालाई बन्धक बनाएर गाजा लगेको अनुमान गरिएको छ ।

६ दिनको युद्ध विरामका बेला १०५ बन्धकलाई रिहा गरिएको थियो। १०० भन्दा धेरै हमासको नियन्त्रणमा रहेको र १९ जना मरिसकेको इजरायलले विश्वास गरेको बीबीसीले जनाएको छ ।

हमासले बन्धक बनाएकामा नेपालका विपिन जोशी समेत छन् । उनको अवस्थाबारे केही थाहा हुन सकेको छैन ।