गायक सुगम पोखरेलले स्टेजबाट दर्शकलाई हाने माइक्रोफोनको झटारो (भिडिओ)

काठमाडौं। चर्चित गायक सुगम पोखरेलले एक साङ्गीतिक कार्यक्रममा दर्शकलाई माइक्रोफोनले झटारो हानेका छन् । गीत गाउँदैगर्दा अगाडि रहेका दर्शकलाई ताकेरै उनले माइक्रोफोनको झटारो हानेका हुन् ।

घटना अस्ट्रेलियाको एडलेडमा हिजो आयोजित कन्सर्टको हो। उनले हानेको माइक्रोफोनले लागेर एक दर्शक सामान्य घाइतेसमेत भए । पोखरेलले दर्शकलाई माइक्रोफोनले हानेको भिडिओ अहिले सामाजिक सञ्जालहरूमा ‘भाइरल’ छ ।

भिडिओका कारण उनलाई सकारात्मक, नकारात्मक प्रतिक्रिया दिनेको संख्या बढ्दो छ । भिडिओ हेर्दा सुगम मदिरामा मातेको पनि देख्न सकिन्छ । भिडिओमा उनले स्टेजबाट एकपटक झिल्के भन्न अनुरोध गर्छन् । त्यसपछि उनले त्यहाँ (अस्ट्रेलिया) पहिलोपटक आएको कुरा गर्छन् र नेपाल भन्छन् ।

त्यसलगत्तै नेपालको जाजरकोटमा भूकम्प गएको बताउँछन् । र भूकम्पमा परेर मृत्यु हुनेको संख्या भन्छन् । त्यसपछि मृत्यु हुनेका लागि मौनधारण गर्न पटक-पटक अनुरोध गर्छन् । तर, मौन धारणमा दर्शकले खासै चासो दिँदैनन् ।

आफ्नो कुरा दर्शकले नमानेपछि उनले स्टेजबाट ओर्लिएर एक दर्शकलाई ताकेरै गर्दै माइक्रोफोनले झटारो हानेको भिडिओमा देख्न सकिन्छ ।

स्टेजमा दर्शकलाई माइक्रोफोनले हानेको भिडिओका कारण आलोचना भइरहेका बेला उनले सामाजिक सञ्जालमा लाइभमार्फत प्रस्टीकरण दिएका छन्। उनी भन्छन्, ‘‘देशलाई भूकम्पले गर्दा दुखिरहेको छ । मलाई पनि दुख्छ। मृतकप्रति श्रद्धाञ्जली दिऔँ भन्दा नमान्ने, अनि मेरै आलोचना गर्ने ?’’