नारायणगढ–बुटवल सडक : दाउन्ने पुग्दा धुलोले मान्छे नै चिन्न नसक्ने

काठमाडौं। नारायणगढबाट दाउन्ने सडकको लम्बाई ८० किलोमिटर छ। नारायणगढमा लगाएको निलो मास्क दाउन्ने पुग्दा धूलोले कालो र खैरो भइसक्छ। आँखीभौँ सेताम्मै हुन्छ। अनुहार चिन्नै नसकिने बन्छ।

शरीर ढाकेका कपडाको त कुरै नगरौँ, उसले पनि रङ फेरिसकेको हुन्छ। सडक स्तरोन्नतिमा भएको ढिलाइकै कारण यात्रुहरू वर्षौ यता यातनापूर्ण यात्रा गर्न बाध्य छन्। निर्माणका क्रममा भत्किएको बाटोले यात्रा निकै पट्यार लाग्दो भइरहेको छ।

आइतबार यही सडकमा मोटरसाइकलमा यात्रा गरिरहेका केही यात्रु भेटिए यस्तै अवस्थामा। ती मध्य एकले भने, ‘‘नारायणगढबाट मोटरसाइकलमा चढेको, यहाँ दाउन्ने आइपुग्दा कपडा र अनुहारको अर्कै रङ्गको भइसकेछ। फोहोरले आँखै भरियो। कहिलेसम्म यसै गरी सास्ती भोग्नुपर्ने हो थाहा छैन।’’

यो सडक खण्डलाई एसियन राजमार्गको गुणस्तर मापदण्डमा विस्तार गर्ने भनेर सम्झौता भएको ५ वर्ष पूरा भयो। ४२ महिनाभित्र काम सम्पन्न गर्ने गरी २०७५ सालको माघ २४ गते सम्झौता भएको सडक अहिलेसम्म बन्न सकेको छैन। पानी पर्दा हिलो, घाम लाग्दा धुलो महिनौँदेखि यो सडकको पहिचान बनिरहेको छ।

‘स्वर्ग’ जाने ‘नर्क’को बाटो !

२०१८ सालमा तत्कालीन राजा महेन्द्रले गैंडाकोटमा शिलान्यास गरेको सडक ५७ वर्षपछि फराकिलो बनाउन थालिएको हो। अहिले चाइना स्टेट कन्स्ट्रक्सन इन्जिनियरिङ कर्पोरेसनले पूर्व–पश्चिम राजमार्गको नारायणगढ–बुटवल खण्डको ११४ किलोमिटर सडक निर्माणको काम गरिरहेको छ।

विस्तार कार्यको शिलान्यास तत्कालीन प्रधानमन्त्री केपी शर्मा ओलीले २०७५ चैत ८ गते बुटवलमा गरेका थिए।

हाल दुई लेन रहेको नारायणगढ–बुटवल सडक खण्डलाई विस्तार गर्दै कतै चार लेन, कतै ६ र तीन लेनको बनाउन लागिएको छ।

गैंडाकोटदेखि दाउन्नेसम्मको ६५ किलोमिटर र दाउन्नेदेखि बुटवलसम्मको ४९ किलोमिटर सडकलाई दुई खण्डमा विभाजन गरेर ठेक्का लगाइएको छ। यो सडकले रुपन्देही, नवलपरासी (बर्दघाट–सुस्तापश्चिम) र नवलपरासी (बर्दघाट–सुस्तापूर्व) गरी तीन जिल्लालाई छुन्छ।