पशुपति मन्दिरभित्र निषेधित ठाउँको फोटो छापियो भारतीय मिडियामा

काठमाडौं। प्रसिद्ध पशुपतिनाथ मन्दिरभित्रको निषेधित क्षेत्रमा भारतीय पत्रिकाले फोटो खिचेर प्रकाशन गरेको छ। भारतीय पर्वतारोहीको लागि प्रार्थना गरिरहेको फोटो प्रकाशन गरिएको छ। बन्धना मेनोनले खिचेको फोटो उनकै बाइलाइनमा समाचारसहित २६ अप्रिल (बुधबार) प्रकाशन गरिएको हो।

एक साताअघि म्याग्दीस्थित अन्नपूर्ण हिमालमा हराएका भारतीय पर्वतारोही बलीजत कौर र अनुराग मलुको जीवितै उद्धार गरिएको थियो। उद्धारपछि दुवैलाई काठमाडौंस्थित एक अस्पतालमा उपचार गरिएको थियो। अनुराग मलुको उपचार भइरहेको छ। बलजीत कौर भने डिस्चार्ज भएका छन्। डिस्चार्जपछि बलजीत कौर पशुपतिनाथ मन्दिर पुगेका थिए।

आफ्नो साथी अनुराग मलूको शीघ्र स्वास्थ्य लाभको कामना गर्न पर्वतारोही बलजीत कौर पशुपतिनाथ मन्दिर पुगेका थिए। उनको साथमा अरू दुई साथी थिए।

सोही क्रममा ‘द प्रिन्ट’की रिर्पाेटर बन्धना मेनोनले फोटो खिचेकी थिइन्। पशुपति मन्दिर भित्र फोटो खिच्न निषेध छ। तर, उनले लुकेर खिचेको फोटो सो मिडियाले प्रकाशन गरेको हो। बन्धनाले सो फोटो आफ्नो ट्वीटर एकान्टमा समेत पोष्ट गरेकी छिन्।