नेसपा (नयाँ शक्ति)को मतदान सकियो, मतगणनाको तयारी हुँदै

काठमाडौं । नेपाल समाजवादी पार्टी (नयाँ शक्ति)को प्रथम महाधिवेशनअन्तर्गत नयाँँ नेतृत्व चयनका लागि भएको मतदान सकिएको छ । मंगलबार अबेर राति मतदान सकिएको नेसपा नयाँ शक्तिले जनाएको छ ।

मतगणना आज (बुधबार) बिहान १० बजेदेखि गर्ने तयारी भएको बताइएको छ ।

काठमाडौंमा जारी महाधिवेशनबाट अध्यक्षसहितका पदाधिकारी र केन्द्रीय समिति सदस्य चयन हुन लागेका हुन् ।

माघ २७ गते प्रज्ञा भवनमा सुरु भएको महाधिवेशनबाट दुई उपाध्यक्ष, एक कोषाध्यक्षसहित केही केन्द्रीय सदस्य निर्विरोध चयन भइसकेका छन् । महाधिवेशनमार्फत ११ पदाधिकारीसहित ९९ सदस्यीय केन्द्रीय समिति चयन गरिने नेसपा (नयाँ शक्ति)ले जनाएको छ ।

महिला उपाध्यक्षमा मानुषी यमी भट्टराई र दलित उपाध्यक्षमा दुर्गा सोब निर्विरोध निर्वाचित भएका छन् ।

अध्यक्षमा संयोजक डा बाबुराम भट्टराई र नेत्र चापागाईंबीच प्रतिस्पर्धा भएको छ ।