देउवा गृहजिल्ला डडेल्धुरामा, जनाए अधुरा आयोजना सम्पन्न गर्ने प्रतिबद्धता

डडेल्धुरा । नेपाली कांग्रेसका सभापति शेरबहादुर देउवा सोमबार गृहजिल्ला डडेल्धुरा आएका छन् । । उनले सोमबार महाकाली नदी किनारमा पुगेर परशुराम धामको दर्शन गरे ।

रङ्गुन नदीमा तटबन्ध निर्माण, परशुराम नगरपालिका–६ र १२ जोड्ने रङ्गुन नदी र सलुन–शीर्ष–रुपाल जोड्ने सडकखण्डमा पक्की पुल निर्माण, सडक बाटोको स्तरोन्नति र कालोपत्रे गरिने सभापति देउवाले प्रतिबद्धता व्यक्त गरे ।

सोमबार बिहान चुरे र महाभारत पर्वतको संगमस्थलमा अवस्थित प्राकृतिक आलितालको अवलोकनपछि पूर्वप्रधानमन्त्री देउवाले बाबा परशुरामको पनि दर्शन गरेको कांग्रेस डडेल्लधुराका सभापति भीमबहादुर साउदले जानकारी दिए ।

डडेल्लधुरा प्राकृतिक रूपमा रमणीय र थुप्रै धार्मिकस्थल, शक्तिपीठ भएको जिल्ला भएकाले धार्मिक पूर्वाधारहरूको विकास गरेर धार्मिक क्षेत्रको विकास गर्ने देउवाले बताए । धार्मिक पूर्वाधारहरू निर्माण भएपछि यहाँको जनजीविकामा परिवर्तन हुने उनको भनाइ छ । –रासस