यू-१९ महिला विश्वकप छनोट : यूएईको सामना गर्दै नेपाल

काठमाडौं । आईसीसी यू-१९ महिला टी-२० विश्वकप एसिया छनोटअन्तर्गत नेपालले शनिबार यूएईको सामना गर्दैछ ।

आफ्नो तेस्रो खेल नेपालले यूएईविरुद्ध उसकै मैदानमा खेल्न लागेको हो । यो खेल बिहान ११:१५ बजे सुरु हुनेछ ।

बुधबारदेखि सुरु भएको प्रतियोगितामा नेपालले पहिलो खेल थाइल्यान्डसँग खेलेको थियो । उक्त खेलमा नेपाल ६७ रनले विजयी भएको थियो । दोस्रो खेलमा कुवेतलाई १०८ रनले हराएको नेपाल उच्च मनोबलका साथ आज मैदानमा हुनेछ ।

प्रतियोगितामा आयोजक यूएईसहित नेपाल, कुवेत र थाइल्यान्ड सहभागी छन् । सहभागी चार टोलीमध्ये शीर्ष स्थान हासिल गर्ने टोली आईसीसी यू-१९ महिला टी-२० विश्वकपका लागि छनोट हुनेछ ।

यू-१९ विश्वकप क्रिकेट प्रतियोगिता अर्को सन् २०२५ जनवरीमा हुँदैछ ।