‘पूर्णबहादुरको सारंगी’ले इतिहास बनाउन लागेपछि ‘केटी हराएको सूचना’ स्थगित

काठमाडौं । आगामी कात्तिक ३० गते रिलिज हुने भनिएको चलचित्र ‘मिसिङः केटी हराएको सूचना’ को प्रर्दशन स्थगित भएको छ । देशभरका हलहरुमा ‘पूर्णबहादुरको सारंगी’ ले इतिहास कायम गर्न लागेपछि सो चलचित्र स्थगित गर्ने निर्णय गरिएको  निर्माण टिमले सूचना मार्फत जानकारी दिएको छ ।

ट्राइसिटी पिक्चर्सले शुक्रबार एक सूचनामार्फत  पूर्णबहादुरले दर्शकबाट पाइरहेको मायाप्रति सद्भाव व्यक्त गर्दै प्रदर्शनको अर्को मिति सार्वजनिक गरिने जनाएको छ ।

सूचनामा भनिएको छ, ‘जुन तरिकाले पूर्णबहादुरको सारंगीले दर्शकको साथ पाएको छ, यो अवस्थामा नयाँ चलचित्र आउँदा चलचित्र घरहरुले नयाँ चलचित्रलाई समेत शो बाँडफाँड गर्नुपर्ने अवस्थाको सिर्जना हुने हुँदा दर्शकको साथ प्राप्त चलचित्र समेतलाई असर पर्ने सम्भावना रहने भएकाले इतिहास कायम गर्ने बाटोमा रहेको चलचित्रलाई सहज बनाइदिनु हाम्रो दायित्व हो भन्ने मान्यता कायम राख्दै केटी हराएको सूचनाको प्रदर्शन हाललाई स्थगित गरिएको जानकारी गराउन चाहन्छौं ।’