दशैंमा ‘हेभीवेट’ फिल्मको रोचक भीडन्त : छक्का पञ्जा ५, ज्वाइँ साब र १२ गाउँ जुध्दा कसले मार्ला बाजी ?

काठमाडौं । यो दशैंमा ‘हेभिवेट’ मानिएका तीन फिल्म जुध्ने भएका छन् । अरू बेलामा प्रदर्शन गर्न हिचकिचाउने निर्माता यो दशैंमा एकैसाथ फिल्म रिलिज गर्ने तयारीमा छन् ।

यसपटकको फूलपाती (२४ असोज)मा तीन वटा नेपाली फिल्म जुध्ने पक्का भइसकेको छ । केही फिल्मले रिलिज डेट पछि सारेका छन् ।

अभिनेता विराज भट्टको निर्माण र उनका छोरा समीर भट्टले डेब्यू गरेको फिल्म ‘१२ गाउँ’, जितु नेपाल र नीति शाह अभिनीत फिल्म ‘ज्वाइँ साब’ र दीपकराज गिरी, दिपा श्री निरौलाको फिल्म ‘छक्का पञ्जा ५’ को रिलिज मिति तय भइसकेको छ ।

ठूला फिल्म मेकरले बडादशैं या नयाँ वर्षको अवसर पारेर फिल्म रिलिज गर्न तछाडमछाड नै गर्छन् । चर्चामा रहेका फिल्मले फूलपातीलाई रिलिज मिति तोकेपछि बडादशैंमा फिल्मको प्रतिस्पर्धा रोचक हुने भएको छ ।

यससँगै ‘आटल लः दफा २१९’ले दशैंमै फिल्म रिलिज गर्ने भने पनि मिति पछि सारेको छ । चर्चित अभिनेत्री स्वस्तिमा खड्का अभिनीत फिल्म ‘बेहुली फ्रम मेघौली’ पनि दशैंमै तर, घटस्थापनामा प्रदर्शनमा आउँदैछ ।

दशैं तिहारमा फिल्म रिलिज गर्नेको लर्को हुने गर्छ । खासमा दशैंमा धेरै बिदा हुने भएकाले पनि मेकरले त्यसको फाइदा उठाउन खोज्छन् । तर, त्यही बिदाको फाइदा लिन खोज्दा दशैंमा भएभरका फिल्मको बाढी आएको जानकार बताउँछन् ।

सुरुमा ‘घर ज्वाइँ’ टिमले फिल्मको रिलिज मिति घोषणा गर्दा कतिपयले चर्चा कमाउने आइडिया लगाएको टिप्पणी गरेका थिए ।

सोही मितिमा विराजको ‘१२ गाउँ’ पनि आउने तय भएको थियो । त्यो भीडमा दीपक र दिपाको फिल्म ‘छक्का पञ्जा ५’ पनि थियो । यो बीचमा केही फिल्म प्रदर्शनमा आउन नचाहेर ब्याक भएका छन् ।

निर्माताले एकपक्षीय ढङ्गले प्रदर्शन मितिमा अडान लिएपछि प्रदर्शक संस्था दबाबमा परेका छन् ।

प्रदर्शक र वितरकको छाता संस्था चलचित्र संघले एउटै मितिमा फिल्म रिलिज नगर्न आग्रह गरे पनि निर्माता पछि हटेनन् । वितरक र निर्मातालाई फिल्म नजुधाउन समेत आग्रह गरे पनि नमानेको संघका प्रवक्ता तथा महासचिव सुरेन्द्र थापाले बताए ।

उनले भने, ‘‘प्रदर्शनअघि धेरै चर्चा भइरहेका ठूला ब्यानरका फिल्म जुध्न लागेपछि हामीले छलफलमै राखेर फरक/फरक समयमा चलाउन भनेका थियौँ । दशैं तिहारकै समयमा असोज महिनाको रिलिज क्यालेन्डर लगायतका विविध समसामयिक विषयमा छलफल गराए पनि मान्नुभएन ।’’

कसले मार्ला बाजी ?

फूलपाती अर्थात् मध्य दशैंमा रिलिज मिति तय भएका तीन फिल्म मध्ये ‘छक्का पन्जा’का गीत बढि चर्चामा छन् । ‘बिहे भएको छैन, कुमारी नि हैन’ बोलको गीतले चर्चा पाइरहँदा अर्को कमेडी गीतले बजार तताइरहेको छ । ‘बल्ल बुझेँ चाल तेरो रैछ त्रिताले’ भन्ने यो गीतले पनि फिल्मको प्रतीक्षालाई अझै बढाइदिएको छ ।

यसअघि ‘छक्का पञ्जा’ टिमले निर्माण गरेका सबै फिल्म व्यावसायिक हिट भइरहेकाले पनि यो टिमबाट दर्शकको बढी नै अपेक्षा छ । निर्माण टिमले पनि यसका लागि निकै मेहनत गरेको बताउँदै आएको छ । कमेडी फिल्म निर्माणमा यो टिमले सफलता हासिल गरिरहेकाले पनि दर्शकलाई ‘छक्का पञ्जा ५’ बाट राम्रै अपेक्षा छ ।

सोही मितिमा रिलिज हुने भनिएको वसन्त निरौलाको फिल्म ‘ज्वाइँ साब’ पनि चर्चामा छ । नीति शाह र जितु नेपालको मुख्य भूमिका हुने यो फिल्म पनि कमेडी शैलीमा नै निर्माण गरिएको छ ।

पहिले दीपकराज गिरीको टिम र जितु नेपालको टिम एउटै भए पनि अहिले प्रतिस्पर्धात्मक हिसाबले एकै मितिमा रिलिज हुँदा फ्यान बाँडिने सम्भावना पनि छ ।

फूलपातीमै आउने भनिएको विराज भट्टको फिल्म ‘१२ गाउँ’ को भने अहिले नै कस्तो व्यापार गर्छ भनेर भन्न सकिने अवस्था छैन । यो फिल्मबाट विराजका छोरा समीर भट्टले डेब्यू गर्दैछन् ।

एक्सन प्रधान भनिएको यो फिल्मले हालसम्म पोस्टर र टिजर सार्वजनिक गरेको छ । फिल्ममा समीरको अभिनय कस्तो छ, यसले दर्शकलाई कत्तिको प्रभाव पार्छ । फिल्मको ट्रेलर कस्तो आउँछ, त्यसअनुसार मात्र दर्शकले धारणा बनाउने सम्भावना छ । टिजरमा भने समीरको राम्रै प्रशंसा भइरहेको छ ।

यी बाहेक ठूला बजेटका केही भारतीय फिल्म रिलिज हुने चर्चा त छँदैछ । दक्षिण भारतीय फिल्म ‘कङ्गुवा’ पनि रिलिज हुँदैछ । यद्यपि नेपाली धेरै फिल्म भएकाले ‘कङ्गुवा’ नेपालमा रिलिज हुने र नहुने भन्ने आधिकारिक जानकारी अझै दिइएको छैन । सूर्यको अभिनय रहेको यो फिल्मले ट्रेलर रिलिज हुनासाथ निकै चर्चा कमाएको छ ।

फूलपातीको एक हप्ताअघि (असोज १७)मा रिलिज हुने स्वस्तिमा खड्काको फिल्म ‘बेहुली फ्रम मेघौली’ को चर्चा पनि राम्रै छ ।

निर्माण टिमले फिल्ममा समावेश दुई गीत सार्वजनिक गरिसकेको छ । तिजतिर सार्वजनिक ‘केही नभने है मेरी बुहारीलाई’ गीतले त टिककटसमित सामाजिक सञ्जालमा राम्रै चर्चा बटुल्यो । यसको ट्रेलरले पनि दर्शकको मन तानेको छ ।

छक्कापन्जा पाँचको ट्रेलर भने आउन बाँकी छ । फिल्म रिलिज हुन एकसाता अघि ट्रेलर आउने दिपकराज गिरी बताउँछन् ।

फिल्म जुध्दा सधैँ घाटा, तर किन यो क्रम रोकिँदैन ?

नेपाली बजारमा सधैँ नै ठूला फिल्म जुध्दा निर्मातालाई घाटा हुने गरेको छ । तर, यस बारेमा निर्माताले जोखिम मोलिरहेका देखिन्छन् ।

दशैंको समयमा फिल्मले अरू समयमा भन्दा राम्रो व्यापार राम्रो गर्छन् । तर, एउटै मितिमा फिल्म जुध्दा व्यापारमा घाटा हुन्छ ।

यसअघि अघिल्लो साल फागुन २५ गते तीन नेपाली फिल्म एकसाथ जुधेका थिए । प्रायजसो दशैं तिहारमा फिल्म यसरी जुधे पनि फागुनमा फागु पूर्णिमाको अवसरमा फिल्म जुधेको सायद पहिलो पटक थियो ।

‘उपहार, काँडेतार र रङेली’ गरी तीन फिल्म एकसाथ रिलिज हुँदा तिनै फिल्मले बक्स अफिसमा उम्दा व्यापार गर्न सकेनन् । तीन फिल्म जुध्दा इनिसियल व्यापारमा समेत असर गर्‍यो । तीनै फिल्मले व्यापारिक रुपमा सफलता पाउन सकेनन् ।

यसअघि जेठको १० गते ‘फर्की फर्की र पुजार सार्की’बीच भिडन्त भयो । यो भिडन्तको विषयमा मिडियामा लामो समयसम्म टिप्पणी भए पनि निर्माताले समझदारी खोजेनन् । न त यी दुई फिल्मको विषयमा चलचित्र संघ, निर्माता संघले कुनै पहल नै गरे ।

ठूला फिल्म जुध्दा जहिले पनि घाटा भएको उदाहरण हुँदाहुँदै पनि अहिले पनि दशैंमा तीन फिल्म जुध्नु राम्रो नभएको निर्माता संघका अध्यक्ष नवल खड्का बताउँछन् ।

‘‘यो दशैंमा पनि यस्तै अवस्था देखिँदैछ । हामीले ठूला फिल्मलाई एक आपसमा नजुधाउने भन्दै पहल सुरु गरेका थियौँ । छलफलमा राखे पनि मानेनन् । तर अन्ततः व्यापार बाँडिन्छन् । निर्मातालाई नै घाटा हुन्छ । असर समग्र फिल्म क्षेत्रलाई पर्छ ।’’