‘छक्का पन्जा ५’ को गीत सार्वजनिक, पूर्व प्रेमिकाको इन्गेजमेन्ट बिथोल्न आइपुगेका प्रेमीको गाली !

काठमाडौं । हास्य प्रधान नेपाली फिल्म शृङ्खला ‘छक्का पन्जा ५’ को नयाँ गीत सार्वजनिक गरिएको छ ।

असोज २४ गते फूलपातीको दिनबाट प्रदर्शनमा आउन लागेको ‘छक्का पन्जा ५’ को गीत ‘बल्ल बुझैँ चाल तेरो रैछ त्रिताले’ बुधबार सार्वजनिक भएको हो ।

यसअघि सार्वजनिक ‘बिहे भाको छैन, कुमारी नि हैन’ बोलको गीतले चर्चा पाइरहँदा सार्वजनिक भएको नयाँ गीतले पनि फिल्मको प्रतीक्षालाई अझै बढाइदिएको छ ।

रमाइलो र हल्का हास्यप्रधान यो गीतमा एक युवतीको इन्गेजमेन्टमा भएको घटनालाई चित्रण गरिएको छ । समारोहको बीचमा युवतीको पुर्वप्रेमी सबैलाई चकित पार्दै आउँछन् । उनले पहिलेको प्रेमसम्बन्धमा गरेको खर्च फिर्ता माग्दै गाली गर्छन् । यसले गीतलाई थप हास्य र रोचक बनाएको छ ।

गीतमा बाबुल गिरीको गायन, शब्द, संगीत र एरेञ्ज छ । गीतको कोरसमा कृष्ण भट्टराई र अयुष खातिवडाको स्वरले थप ऊर्जा दिएको छ ।

‘छक्का पन्जा ५’ लाई दिपाश्री निरौलाले निर्देशन गरेकी हुन् । यो गीतको कोरियोग्राफी गम्भीर बिष्टले गरेका छन् । भिडिओमा दीपकराज गिरि, दीपाश्री निरौला, केदार घिमिरे, वर्षा सिवाकोटी लगायतका कलाकारको अभिनय र नृत्य छ । भिडिओमा मेक्सम गौडेल, सुरवीर पण्डित, र रमेश्वर केसी पनि देखिन्छन् ।