घरजग्गा र सवारी कर्जामा जोखिम भार घटाइने 

काठमाडौं । नेपाल राष्ट्र बैंकले घरजग्गा (रियल स्टेट) कर्जा, हायर पर्चेज प्रकृतिका सवारी साधन कर्जा र ५० लाख रुपैयाँसम्मको सेयर धितो कर्जाको जोखिम भार घटाउने भएको छ । राष्ट्र बैंकले शुक्रबार सार्वजनिक गरिएको चालु आर्थिक वर्षको मौद्रिक नीतिमार्फत यस्तो व्यवस्था गरेको हो ।

चालु पुँजी कर्जासम्बन्धी मार्गदर्शनमा संशोधन, पहिलो आवासीय घर कर्जाको सीमा वृद्धि र कृषि, साना, घरेलु तथा मझौला उद्यम व्यवसायमा प्रवाह भएको २ करोड रुपैयाँसम्मको कर्जालाई रेगुलेटरी रिटेल पोर्टफोलियोमा गणना गर्न पाउने व्यवस्था कार्यान्वयन गरिएको छ ।

त्यसै गरी, रियल स्टेट कर्जा, हायर पर्चेज प्रकृतिका सवारी साधन कर्जा र ५० लाख रुपैयाँसम्मको सेयर धितो कर्जाको जोखिम भार घटाउने, असल वर्गमा वर्गीकरण भएका कर्जाहरूको कर्जा नोक्सानी व्यवस्था घटाउने र घर जग्गा खरिद प्रयोजनको लागि प्रवाहित कर्जाको हकमा मासिक किस्ता आम्दानी अनुपात खुकुलो बनाउने व्यवस्था कार्यान्वयनमा ल्याइएको राष्ट्र बैंकले जनाएको छ ।