संसद्‌मा उठ्यो उपसभामुखमाथि प्रश्न, कांग्रेसले राजीनामा माग्दा माओवादीले भन्यो ‘नैतिक प्रश्न हो’

काठमाडौं । उपसभामुख इन्दिरा रानामाथि प्रतिनिधि सभाको बैठकमै प्रश्न उठेको छ । अहिले जारी प्रतिनिधि सभाको बैठकमा सुरुमै कांग्रेसका सांसद रामहरि खतिवडाले उपसभामुखलाई मानव तस्करसँग जोडेर व्याख्या गर्दै छानबिन र राजीनामा माग गरे ।

असम्बन्धित पाँच जना व्यक्तिलाई अमेरिका पठाउन उपसभामुख रानाले आफ्नो लेटरहेटड प्रयोग गरेको बताए ।

प्रतिनिधि सभामा कुनै पत्र आए सभामुख हुँदा महासचिवमार्फत् परराष्ट्रमन्त्रालय पुग्नुपर्नेमा त्यसो नभएको भनेर उनले प्रश्न गरे ।

सांसद खतिवडाले भने, ‘‘संसद्सँग कुनै साइनो नभएका पाँच जना मान्छे मानव तस्करले प्रयोग गरेर अमेरिकाका भिसाको लागि अन्तर्वार्ताका लागि प्रयोग गरेको पत्र प्राप्त भयो । यस्तो अवस्थामा उपसभामुखले अब संसद्को कमान्ड गर्न सुहाउँछ कि सुहाउँदैन ?’’

माओवादी सांसद् माधव सापकोटाले पनि यो प्रकरणमा उपसभामुखप्रति नैतिक प्रश्न रहेको टिप्पणी गरे । साथै उनले संवैधानिक परिषद्मा आफ्नो सदस्य राख्ने नियतबाट उपसभामुखलाई प्रश्न नउठाउन आग्रह गरे । उपभामुख राना रास्वपाबाट हुन् । उपभामुख संवैधानिक परिषद्मा सदस्य हुन्छन् ।

उपसभामुखको भिसा सिफारिस प्रकरणमा कांग्रेसले भन्यो- मान्छे बेच्नेहरू यतैकतै छन्, संसद्लाई कन्सल्टेन्सी बनाइयो

एमाले सांसद् भन्छन्-  मान्छे बेच्ने उपसभामुख चाहिएको होइन

संसदमा एमाले सांसद् दामोदर वैरागीले पनि उपसभामुखले पदिय मर्यादाविपरित कार्य गरेको बताउँदै राष्ट्रिय स्वतन्त्र पार्टीले गरेको बचाउको विरोध गरे ।

उनले भने, ‘‘मैले मानव तस्करी गरेको ओ भन्ने कुरो उपभामुखकै पत्र बोल्छ । तर फेरि देशको चौथो दल हौँ, नयाँ हौँ भनेर अंग्रेजीमा भाषण गर्ने हो विज्ञप्ति बढियो । लेनदेन छ भन्ने सुनियो । हामीलाई मान्छे बेच्ने यस्तो उपसभामुख चाहिएको होइन । महिलाको सम्मेलनमा जान पुरुष सिफारिस गरियो ।’’

उपसभामुख रानामाथि ‘मानव तस्करी’को आरोप, बाहिरियो अमेरिकी दूतावासमा भिसाका लागि सिफारिस गरेको पत्र

रास्वपाको प्रतिरक्षा

संसदमामा रास्वपा सांसदले भने उपसभामुखको बचाउ गरेको छ । सांसद सुमना श्रेष्ठले उपसभामुखको संसदमा प्रतिरक्षा गरिन् ।

उनले भनिन्, ‘‘तपाईंहरुलाई मन लाग्यो मिडिया ट्रायल गर्‍यो । मानवतस्करीजस्तो ठूलो आरोप तपाईँहरूले यस्तो सजिलोसँग डिक्लेयर गर्नुभयो । डिक्लेयर गर्नु न त भुटानी शरणार्थी प्रकरण कसले गरेको हो ? त्यो आँट छ ? एउटा महिला जसले यस्तो कठिन समयबाट यो ठाउँमा आउनुभएको छ । उहाँलाई हेप्न नखोज्नुहोला । एक वर्ष अगाडिदेखि पत्र हातमा राखेर बसिरहनुभएको रहेछ, कुन बेला ठोकौँ भनेर । ल्याङल्याङ मिडिया ट्रायल गरेर चरित्रहत्या गर्न खोज्ने ?’’