को बन्ला भारतको नयाँ टी-२० कप्तान ?

काठमाडौं । भारतीय क्रिकेट टोलीले यसै महिनाको अन्त्यमा श्रीलंका भ्रमण गर्ने भएको छ । त्यहाँ तीनवटा टी–२० खेलपछि तीन ओडीआई खेल हुनेछन् ।

रिपोर्टका अनुसार यस भ्रमणका लागि आज नै टीम इन्डियाको घोषणा हुनसक्छ । भ्रमण जुलाई २७ गतेबाट सुरु हुँदैछ ।

रोहित शर्माले टी–२० बाट सन्यास लिएका छन् । यस्तो अवस्थामा यो ढाँचामा भारतको कप्तान को बन्ने भन्ने सबैभन्दा ठूलो प्रश्न हो ।

जिम्बावे भ्रमणमा सिनियर खेलाडीको अनुपस्थितिमा शुभमन गिलले जिम्मेवारी पाएका थिए । नियमित कप्तानका लागि हार्दिक पाण्डेय र सूर्यकुमार यादवको नाममा चर्चा भइरहेको छ ।

को बन्ला नयाँ कप्तान ?
भारतको नयाँ टी-२० कप्तानको कुरा गर्दा हार्दिक र सूर्यकुमार दुवैको नाम चर्चामा छ । अनुभव र कीर्तिमानको कुरा गर्दा उनीहरु बराबर छन् ।

हार्दिकको कप्तानीमा गुजरात टाइटन्सले आईपीएलको उपाधि जितेको थियो । उनी हाल मुम्बई इन्डियन्सका कप्तान पनि हुन् । देशबाट रोहितको कप्तानीमा हार्दिक उपकप्तानको भूमिकामा थिए । जसका कारण नयाँ कप्तान बन्ने उनको दाबी बलियो देखिन्छ ।

सूर्यकुमार गम्भीरको मनपर्ने खेलाडी
सूर्यकुमार प्रमुख प्रशिक्षक गौतम गम्भीरका मनपर्ने खेलाडी हुन् । सूर्यकुमारलाई फिटनेसको कुनै समस्या छैन । यता अनफिट भएका कारण हार्दिकले धेरै खेल गुमाउन सक्छन् ।

एक समय सूर्यकुमारले गम्भीरको कप्तानीमा रहेको कोलकाता नाइट राइडर्समा पनि उपकप्तानको भूमिका निर्वाह गरेका थिए ।

गम्भीरले सूर्यकुमारलाई नेताको रूपमा देख्छन् । यही कारणले गर्दा गम्भीरले सूर्यकुमारलाई कप्तानी दिने पक्षमा मतदान गर्न सक्छन् ।

रोहित सन् २०२२ को टी–२० विश्वकपपछि टी–२० ढाँचामा खेलेका थिएनन् । सो अवधिमा हार्दिकले कप्तानको जिम्मेवारी पाएका थिए ।

हार्दिकलाई टीऔ-२० विश्वकप २०२४ को कप्तानको रूपमा पनि हेरिएको थियो । तर, अन्ततः बीसीसीआईले रोहितलाई कप्तान बनाउने निर्णय गरेको थियो ।

हार्दिकको अनुपस्थितिमा सूर्यकुमारले ७ टी–२० खेलमा भारतको कप्तानी समेत गरेका छन् ।