आफ्ना वकिलका भान्जालाई ‘एकदिने’ एआइजी बनाउँदै गृहमन्त्री रवि लामिछाने !

काठमाडौं । रमाइलोका लागि कहिलेकाहीँ सोध्ने गरिन्छ— तपाईं एक दिनका लागि प्रधानमन्त्री वा मन्त्री हुनुभयो भने के गर्नुहुन्छ ?

यसमा धेरैले रमाइला उत्तर दिन्छन्, आ-आफ्नै अनुकूलतामा । त्यो प्रश्न वा जवाफ केवल परिकल्पना मात्र हो ।

तर, ठ्याक्कै यस्तै मिल्दोजुल्दो पद प्रहरीका एक उच्चपदस्थले पाउँदैछन् । प्रहरीको नेतृत्वको जिम्मा लिने (आइजीपी) सबै प्रहरीका सपना हुन्छ । तर, त्योभन्दा तल्लो एक तह तल्लो पद अतिरिक्त प्रहरी नायव महानिरीक्षक (एआइजीपी) जम्मा १ दिनको लागि बन्दैछन्, एकजना डीआइजी ।

उनी हुन्, प्रहरी नायव महानिरीक्षक (डीआईजी) पोषराज पोखरेल । उनलाई एआइजी बनाउने प्रस्ताव गरिएको छ । तर, उनको पदावधि जम्मा एक दिनको मात्र हुनेछ ।

२१ असारबाट उनी अवकाशमा जान लागेका छन् । तर, उनलाई एआइजी बढुवाका लागि सिफारिस गरेको हो ।

पोखरेल हाल प्रहरी प्रधान कार्यालय महिला बालबालिका तथा ज्येष्ठ नागरिक सेवा निर्देशनालय नक्सालमा दरबन्दी रही काठमाडौं उपत्यका ट्राफिक प्रहरी कार्यालय, रामशाहपथमा कार्यरत छन् ।

यही असार १९ गतेबाट एआइजी उमेशराज जोशी अनिवार्य अवकाशमा जाँदैछन् । त्यसको ठाउँमा उनी एआइजी बन्नेछन् । एकदिन २० गते एआइजी हुनेछन् । भोलिपल्टबाट अवकाशमा जानेछन् ।

गृहमन्त्रालयका सचिव एकनारायण अर्याल संयोजक रहेको बढुवा सिफारिस समितिले सोमबार डीआइजी पोखरेललाई एकदिने एआइजी बढुवाका लागि सिफारिस गरेको हो ।

प्रहरी नियमावली २०७१ को दफा १२७ अनुसार एआइजी र डीआइजी ५६ वर्षे उमेर हदका कारण अनिवार्य अवकाशमा जानेछन् । जसकारण पोखरेल एआइजीमा बढुवा नभएको खण्डमा पनि त्यही दिन अनिवार्य अवकाशमा जाने थिए ।

असार १९ गते उमेशराज जोशी एआइजीबाट अवकाश पाएर पद रिक्त हुने भएपनि गृहमन्त्री रवि लामिछानेको स्वार्थमा पोखरेललाई नियमविपरीत एआइजी बनाउन लागिएको हो । सुशासनको चर्को नारा दिने गृहमन्त्री लामिछानेले त्यसो गरेका हुन् ।

बढुवाका लागि एक हप्ताअघि मात्र सिफारिस गर्नुपर्ने भएपनि प्रहरी महानिरीक्षक वसन्तराज कुँवर सोमबार बेलुका अमेरिका जाने भएपछि उनलाई समयअगावै सिफारिस गरिएको हो । स्रोतका अनुसार हाल पोखरेल लामिछानेका विवादित मुद्दाहरू प्रतिरक्षा गरिरहेका वरिष्ठ अधिवक्ता सुशील पन्तको भान्जा हुन् ।