इजरायली सेनाले भन्यो – हमासलाई कहिल्यै मेटाउन सकिँदैन

काठमाडौं । गाजा पट्टीमा आठ महिनाभन्दा बढी समयदेखि जारी लडाइँपछि पनि इजरायलले स्पष्ट परिणाम हासिल गर्न सकेको छैन । यसको नकारात्मक असर देशको सेनाका उच्च अधिकारी र प्रधानमन्त्री बेन्जामिन नेतान्याहुबीचको सम्बन्धमा पनि देखिएको छ ।

इजरायली सेनाका प्रवक्ताले हमासलाई पूर्ण रूपमा मेटाउन नसकिने बताएका छन् । यो कथनले नेतन्याहुको हमासको पूर्ण विनाश सरकारको युद्धको सबैभन्दा महत्त्वपूर्ण लक्ष्य हो भन्ने दाबीमाथि प्रश्न खडा गरेको छ ।

यो भनाइको इजरायलमा निकै चर्चा भइरहेको छ र सेनाको स्पष्टिकरणपछि पनि यसलाई सरकारसँगको भिडन्तका रूपमा हेरिएको छ ।

सीएनएनको रिपोर्टका अनुसार इजरायल डिफेन्स फोर्स (आईडीएफ)का प्रवक्ता रीड एडमिरल ड्यानियल हगारीले च्यानल १३ सँगको अन्तर्वार्तामा यस्तो बताएका हुन् ।

उनले भनेका छन्, ‘हमासलाई पूर्ण रूपमा मेटाउन सकिन्छ भन्नु भनेको जनताको आँखामा धूलो फाल्ने जस्तै हो । गाजामा कुनै आतंक, कुनै सैन्य अपरेटरहरू, रकेटहरू र सशस्त्र व्यक्तिहरू हुनेछैनन् भन्ने जनतालाई भन्नु झूट हो । गाजामा आतंक हुनेछ । हमास गाजाका बासिन्दाहरूको हृदयमा गहिरो जरा गाडेको विचार हो ।’

इजरायलको सुरक्षा मन्त्रिपरिषद्का अनुसार गाजामा आफ्नो युद्धको उद्देश्यमध्ये हमासको सैन्य र प्रशासनिक क्षमताको पूर्ण विनाश रहेको बताएको छ ।

हगरीको टिप्पणीपछि सरकार र सेनाबीच दरार आएको अनुमान गरिएको छ । तर, आईडीएफले सरकारको युद्ध लक्ष्यहरूप्रति प्रतिबद्ध रहेको र हगारीले हमासको उपस्थितिलाई विचारधाराको रूपमा मात्र बोलिरहेको स्पष्टिकरण दिएको छ ।

हगारीको टिप्पणीमा आईडीएफको स्पष्टीकरणको बावजूद इजरायली सरकार र सेनाको बीच दरार गहिरो देखिन्छ ।

गाजाका लागि रणनीति बनाउन नेतान्याहु आफ्नो सरकारका सदस्यहरू र अमेरिकालगायत इजरायलका सहयोगीहरूबाट बढ्दो दबाबमा छन् ।

इजरायलले पछिल्लो आठ महिनामा गाजामा दाबी गरेको सफलता हासिल गर्न सकेको छैन । यसमा हमासलाई हटाउने कुरा पनि समावेश छ ।

यी सबैको बीचमा हगारीको टिप्पणीले इजरायलको सैन्य अभियानले युद्ध लक्ष्यहरू हासिल गर्न असक्षम हुन सक्छ र नेतान्याहूको दावीको बाबजुद हमास एक शक्तिशाली शक्ति बन्न सक्छ भन्ने दावीहरूलाई उजागर गरेको छ ।