काठमाडौं । काभ्रेको रोशी गाउँपालिका अज्ञात समूहले बुद्धचित्तको रूख काटेको छ।
बिहीबार राति रोशी-५ नागबेलीस्थित ठाकुरानी तामाङको बारीमा रहेको बुद्ध चित्तको बोट काटिएको जिल्ला प्रहरी कार्यालय काभ्रेका डीएसपी राजकुमार श्रेष्ठले जानकारी दिए।
फूल फुल्दै गरेको बुद्धचित्तको रूख काटिएको हो । गए राति १ बजे हातहतियारसहित आएका झण्डै २० जनाको समूहले डरत्रास देखाउँदै बुद्धचित्तको रूख काटेको पाइएको डीएसपी श्रेष्ठले बताए ।
साथै, आँगनमा चार वटा घरेलु सकेट बम राखिएको फेला परेको छ । घरनजिकै जनमुक्ति सेना नेपाल लेखेको ज्याकेट पनि फेला परेको प्रहरीले जनाएको छ ।
उक्त रूख केही महिनाअघि नै बिक्रीसमेत भइसकेको खुलेको छ । समिर त्रिपाठी भन्ने व्यक्तिलाई सो रूख ३ करोड रूपैयाँ ठेक्कामा लगाइएको पाइएको प्रहरीले जनाएको छ ।
घटनामा अहिलेसम्म कोही पनि पक्राउ नपरेको बताउँदै डीएसपी श्रेष्ठले अनुसन्धान भइरहेको जानकारी दिए ।
Facebook Comment
Comment