नेपाल आँखा अस्पताल स्थापनाको ५० वर्ष पूरा, ३४ लाखभन्दा बढीको परीक्षण

नेपाल आँखा अस्पताल स्थापना भएको ५० वर्ष पूरा भएको छ । आइतबार स्वर्ण महोत्सवबारे जानकारी दिन आयोजित पत्रकार सम्मेलनमा अस्पतालले ५० वर्षको अवधिमा ३४ लाख ३८ हजार ५७२ जनाको आँखा परीक्षण गरेको र १ लाख ३७ हजार १७४ जनाको आँखाको शल्यक्रिया गरेको जानकारी दिएको छ ।

काठमाडौँको त्रिपुरेश्वरमा रहेको नेपाल आँखा अस्पताल नेपालमा आँखा स्वास्थ्यको क्षेत्रमा विशेषज्ञ सेवा प्रदान गर्ने पहिलो अस्पताल भएको अस्पतालका सचिव युद्धध्वज सापकोटाले जानकारी दिए । उनले भने, ‘केही महिना अगाडि अस्पतालले सानो बच्चाको आँखाको शल्यक्रिया गरेको सुन्नुभएको होला । समय नपुगी जन्मिने बच्चाको आँखा स्कृनिङ सेवा प्राथमिकताका साथ लागू गरेका छौँ, हालै मात्र ४०० जनाको स्कृनिङ गर्दा ३५ जनामा समस्या देखिएको थियो ।’

सो अस्पतालमा १५ जना नेत्र विशेषज्ञ र ११३ जना कर्मचारी कार्यरत छन् । कर्निया, मोतीबिन्दु, जलविन्दु, रेटिना, अकुलोप्लाष्टी एवम् बाल आँखा सेवाका लागि अलग्गै विभागहरूबाट सेवा प्रदान गरिँदै आएको सापकोटाले बताए ।

आधुनिक प्रविधि र गुणास्तरीय उपकरणबाट सेवा दिँदै आएको अस्पतालले आँखा निदान एवं उपचारका लागि आवश्यक अनुसन्धान गर्न बोर्ड गठन गरी काम सुरु गरेको जनाएको छ ।

अस्पतालमा चालु आर्थिक वर्षको ८ महिनामा बहिरङ्ग विभागबाट १ लाख १ हजार ७३४ जनाले सेवा लिएका छन् । हाल दैनिक ४०० देखि ७०० जना बहिरङ्ग सेवा लिन अस्पताल पुग्ने गरेका छन् ।

अस्पतालले विद्यालयस्तरका विद्यार्थीहरूको आँखा जाँच गरी निःशुल्क चस्मा प्रदान गर्ने गरेको समेत सापकोटाले बताए । यस वर्ष मात्रै १४,९९४ जनाको दृष्टि परीक्षण गरी १,०१० जनालाई निःशुल्क चस्मा वितरण गरिएको अस्पतालले जनाएको छ ।