को हुन् अनन्त अम्बानीसँग बिहे गर्न लागेकी राधिका मर्चेन्ट ?

काठमाडौं । ‘साँच्चै, म धेरै भाग्यशाली छु । मैले राधिकालाई कसरी भेटेँ त्यो पनि थाहा छैन । सात वर्षअघि राधिकालाई भेटेँ । र, हिजोको कुरा हो जस्तो लाग्छ । हाम्रो माया दिनप्रतिदिन गहिरो हुँदै गइरहेको छ ।’

भारतका सबैभन्दा धनी व्यक्ति मुकेश अम्बानीका कान्छा छोरा अनन्त अम्बानीले आफ्नी भावी पत्नी राधिका मर्चेन्टका लागि आफ्नो प्रि-वेडिङ समारोहमा भनेको कुरा हो यो ।

दुवैको इन्गेजमेन्ट सन् २०२२ मा राजस्थानको नाथद्वाराको श्रीनाथजी मन्दिरमा भएको थियो । यी दुवैले यही वर्ष जुलाई १२ मा विवाह गर्दैछन् ।

त्यसअघि गुजरातको जामनगरमा चलेको ३ दिन लामो प्रि-वेडिङ समारोहमा ग्लोबल टेक कम्पनीहरूका सीईओहरू, पप स्टार रेहाना र पूर्व अमेरिकी राष्ट्रपति डोनाल्ड ट्रम्पकी छोरी इभान्का ट्रम्प सहभागी भए ।

को हुन् राधिका मर्चेन्ट ?

२९ वर्षीया राधिका वीरेन मर्चेन्ट र शैला मर्चेन्टकी छोरी हुन्, जो ग्लोबल फार्मास्युटिकल निर्माता ‘इन्कोर हेल्थकेयर’की सीईओ हुन् ।

राधिकाले क्याथेड्रल एण्ड जोन कन्नन स्कूल र इकोले मोन्डिएल वर्ल्ड स्कूल, मुम्बईमा अध्ययन गरेकी छिन् । उनले न्यूयोर्क विश्वविद्यालयबाट राजनीतिशास्त्रमा स्नातक गरेकी छन्।

फोर्ब्सका अनुसार न्यूयोर्क विश्वविद्यालयमा अध्ययन गर्दा उनले मुम्बईको सिडर कन्सल्टेन्ट्समा व्यापार रणनीति सल्लाहकारको रूपमा काम गरेकी छन् ।

समाचार वेबसाइट ‘मिन्ट’का अनुसार अमेरिकाबाट भारत फर्किएपछि उनी लक्जरी रियल स्टेट कम्पनी इसप्रभामा आबद्ध भइन् ।

एक वर्ष काम गरेपछि उनी एन्कोर हेल्थकेयरमा प्रवेश गरिन् । उनी हाल एनकोर हेल्थकेयरको बोर्ड अफ डाइरेक्टरमा कार्यरत छन् ।

राधिकाको लिंक्डइन प्रोफाइलका अनुसार व्यवसायका अलावा उनी नागरिक अधिकार, आर्थिक सशक्तीकरण, शिक्षा र स्वास्थ्य क्षेत्रमा रुचि राख्छिन्।

राधिका मुकेश अम्बानीकी छोरी ईशा अम्बानीको विवाहमा पनि पुगेकी थिइन् र त्यसयता उनी अम्बानी परिवारका धेरै समारोहमा देखिएकी थिइन् ।

प्रि-वेडिङ समारोहमा राधिकाले जामनगरको बारेमा अनन्त र उनको मुटु यहीँ बस्ने बताएकी थिइन् ।

उनले भनेकी थिइन्, ‘जब अनन्त र मैले विवाह गर्ने निर्णय गर्यौं, हामी दुवैको मनमा हाम्रो उत्सवको लागि एउटै ठाउँ थियो र त्यो जामनगर थियो । हामी कहाँ हुर्क्यौं, जहाँ हामी साथी भयौं, जहाँ हामी प्रेममा पर्यौं र जहाँ हाम्रो सम्बन्ध बलियो भयो। मलाई अनन्तमा धेरै गर्व छ।’