राजनीति छोड्दै गौतम गम्भीर, मोदीलाई दिए धन्यवाद

काठमाडौं । भारतका पूर्व क्रिकेटर तथा पूर्वी दिल्लीका भाजपा सांसद गौतम गम्भीरले राजनीति छोड्ने संकेत गरेका छन् ।

गम्भीरले एक्समा लेखेका छन्, ‘मैले माननीय पार्टी अध्यक्ष जेपी नड्डालाई मेरो राजनीतिक कर्तव्यबाट मुक्त गर्न अनुरोध गरेको छु ताकि म मेरो क्रिकेट प्रतिबद्धताहरूमा ध्यान केन्द्रित गर्न सकूँ। म माननीय प्रधानमन्त्री नरेन्द्र मोदी जीलाई हृदयदेखि धन्यवाद दिन्छु।’

यससँगै उनले केन्द्रीय गृहमन्त्री अमित शाहलाई ट्याग गर्दै लेखे, ‘मलाई जनताको सेवा गर्ने मौका दिनुभएकोमा धन्यवाद। जय हिन्द।’

गम्भीर हाल भाजपाको टिकटमा पूर्वी दिल्लीबाट लोकसभा सांसद छन् । गौतम गम्भीर टी-२० विश्वकप २००७ र एकदिवसीय विश्वकप २०११ मा भारतीय टोलीका सदस्य थिए।

पछिल्ला केही वर्षहरूमा गम्भीर आफ्नो राजनीतिक टिप्पणीहरू र खेल क्षेत्र र बाहिरका लागि धेरै पटक विवादमा फसेका छन्।