एउटा गलत फैसलाले बर्बाद बनाएको गायिका अनुराधा पौडवालको सिंगो करियर

काठमाडौं । बलिउड गायिका अनुराधा पौडवालका लागि सायदै परिचयको आवश्यकता पर्छ । सन् १९७३ मा गायिकाको रूपमा डेब्यू गरेदेखि नै उनी लोकप्रियताको शिखरमा रहन सफल गायिका हुन् ।

उनलाई ९० को दशककी क्विन समेत भनेर चिनिन्छ । उनले जति पनि गीत गाइन् ती गीत अहिलेसम्म पनि उत्तिकै रुचाइएका छन् । अहिले पनि उनका फ्यानको मनमा उनी उतिकै लोकप्रिय छिन् ।

उनी त्यस्ती भाग्यमानी गायिका हुन् जसले आशा भोस्ले, किशोरकुमार , मुकेशजस्ता सांगितक आइकनसँग काम गर्ने अवसर पाइन् । उनी जतिबेला चर्चाको शिखरमा थिइन् त्यो बेला बलिउडको संगीत क्षेत्र पनि सुनौलो युगमा चम्किरहेको थियो ।

शालिन प्रस्तुती र सुमधुर स्वरकी धनी पौडवाल विवादको घेरामा समेत तानिइएकी थिइन् ।

गायिका अल्का याज्ञनिकले उनीमाथि गीत चोरी गरेको आरोप समेत लगाएकी थिइन् । अल्काले भनेकी थिइन् – अनुराधाले मेरो आवाजको स्वरमा रहेको गीतलाई चोरेर जस्ताको तस्तै आफ्नो आवाजमा गाएर दरिद्रता देखाएकी छन् ।

लता मंगेशकरको भन्दा धेरै गीत आफुले एक दिनमा गाएर लताको रेकर्ड बे्रक गरेको दाबी गरेकी थिइन् । त्यतिबेला टी सिरिजमा अनुराधाका गीतहरु ब्याक टु ब्याक आइरहेका थिए, जुन गीतहरु चर्चित पनि थिए । त्यही उन्मादमा उनले लता भन्दा आफु धरै गीत गाउने दाबी गरेकी थिइन् ।

उनका अभिव्यक्तिलाई लिएर बलिउडमा निकै आलोचना समेत भएको थियो ।

त्यस्तै, अनुराधाले लता र आशा भोसलेले बलिउड संगीतमा एकाधिकार जमाएको आरोप पनि लगाएकी थिइन् । आलोचना र विवादको घेरामा पर्दै गएपछि अनुराधाले काम पाउन छाड्दै गइन् ।

उनलाई अन्य म्यूजिक डाइरेक्टरले काम दिन छाडेपछि विक्षिप्त बनेकी गायिका पौडवाल टी सिरिजमा मात्रै गाउने निर्णयमा पुगिन् । उनले टी सिरिजमा मात्रै गाउने कसम नै खाइन् ।

यहि निर्णयले उनलाई संगीतको साँघुरो घेरामा सिमिति गरिदियो । टी सिरिज बाहेक अन्य गीत नगाउने उनको यही निर्णय उनका लागि जीवनकै ठूलो गल्ती भइदियो ।

उनको दिनप्रतिदिन उकालो लाग्दै गरेको करियर त्यही एउटा निर्णयले एकाएक ओरालो लाग्दै गयो ।

६८ वर्षिया पौडवाल अहिले भजन किर्तनमा आवाज दिएर संगीतलाई निरन्तरता दिइरहेकी छन् ।