२ जनाको ज्यान गएपछि ईपीएस परीक्षाका लागि खुल्यो आवेदन, पुस १६ गतेदेखि फाराम भर्न सकिने

काठमाडौं। ईपीएस कोरिया भाषा परीक्षा अन्तर्गत सिप बिल्डिङ (पानीजहाज निर्माण) क्षेत्रका विद्यार्थीले उत्पादनमूलक क्षेत्रमा आवेदन दिन पाउने भएका छन्।
उनीहरूले आन्दोलन गर्दै आएका थिए । सोही क्रममा २ जनाको ज्यान गएको थियो ।

वैदेशिक रोजगार विभागले उनीहरूलाई आवेदन दिन पाउने निर्णय गरेको हो । त्यसका लागि पुस १६ गतेदेखि १८ गतेसम्म आवेदन दिन सकिने ईपीएस कोरिया शाखाले शुक्रबार अबेर सूचनामार्फत जनाएको छ ।

सिप बिल्डिङ क्षेत्रमा आवेदन दिएका ३१ हजार भन्दा बढिले उत्पादनमूलक क्षेत्रमा आवेदन दिन नपाउने व्यवस्था थियो ।

चर्को दबाब तथा उच्च अदालत पाटनको अन्तरिम आदेशपछि उनीहरूका लागि आवेदन खुला गरेको हो ।

अदालतले निवेदकसहित इच्छुक सबैलाई आवेदन फाराम भर्न दिन आदेश जारी गरेको थियो ।

यसअघि सुरज पाठकसहित १८ जनाको हकमा फाराम भर्न दिन भन्दै आदेश जारी गरेको थियो । त्यसपछि उनीहरूले शुक्रबार आवेदन फाराम भर्न निवेदन दिएका थिए ।

ती बाहेककाले आन्दोलन गर्ने क्रममा दुई जनाको मृत्यु भएको थियो । अब भने पानीजहाज निर्माण क्षेत्रकाले उत्पादनमूलक क्षेत्रमा आवेदन दिन पाउने भएका छन् ।