प्रेमीलाई बैंक खाता दिएपछि ठगिएकी युवती नै हिरासतमा

काठमाडौं। फेसबुकमा चिनजान भएर प्रेममा परेकी एक युवती ब्वाइफ्रेन्डको खाताबाट आफूलाई पैसा ट्रान्सफर गर्दा हिरासतमा पुगेकी छिन् । बुटवलमा गहना पसल सञ्चालन गर्दै आएकी उक्त युवती भारी रकम ठगीको आरोपमा अहिले काठमाडौं उपत्यका अपराध अनुसन्धान कार्यालयको हिरासतमा छिन्।

प्रेमीलाई विश्वास गरी बैंक खाता चलाउन दिएकै कारण उक्त युवती अहिले कानूनी झमेलमा फसेकी छिन् ।

अनलाई ठगीको आरोपमा मुद्दा खेप्नुपरेपछि मात्रै उनलाई थाहा भयो कि, आफूले माया गरेको व्यक्ति अपराध (स्क्याम)मा संलग्न रहेछन् भनेर । अहिले त उल्टै उनले झन्डै तीन लाख रुपैयाँ क्षतिपूर्ति तिर्नुपरेको छ।

यसरी फसिन् युवती

फेसबुकबाट चिनजान भई प्रेममा परेकी उनलाई एक दिन प्रेमी (युवक)ले बैंक खाता विवरण पठाउन भने। युवतीले पनि सजिलै सबै विवरण दिइन्। तर, सुझबुझ नगरी बैंक खाता नम्बर दिँदा ती युवती उल्टै ठगीको आरोपी बन्न पुगेकी हुन्।

उनको प्रेमीले एकजना महिलालाई पार्सल पठाइदिएको भनेका रहेछन्। पार्सलमा विभिन्न गरगहना, तीन हजार डलरलगायत अन्य महँगा सामग्री पठाएको भनिएको थियो।

पार्सल पाउने महिलासँग युवतीका प्रेमीले भन्सार शुल्कका नाममा दुई लाख ४८ हजार रुपैयाँ उठाए। महिलाले युवतीकी प्रेमीलाई पैसा पठाइन्। तर पार्सल आएन। नआएपछि ती महिला ठगिएको महसुस गरी प्रहरी कार्यालयमा उजुरी हाल्न गइन्।

प्रहरीमा गएर महिलाले आफूले रकम पठाएको बैंक खाता उल्लेख गरिन्। त्यहाँ त बुटवलकी युवतीको खातामा पैसा जम्मा गरिएको थियो। बुटवलकी युवती पक्राउ परिन्। तर, अनुसन्धानबाट थाहा भयो। उनको खाता प्रेमीले चलाउने रहेछन्। आफ्नो एकाउन्टबाट मानिसहरू ठगिएको थाहा पाएपछि युवती छाँगोबाट खसेझैँ भइन्।

युवतीका आफन्तका अनुसार उनी करिब एक वर्षअघि फेसबुकमा एक युवकसँग जोडिएकी थिइन्। त्यसपछि कुरा हुँदैजाँदा उनीहरू नजिकका साथी भए। पछि उनीहरूको मित्रता प्रेममा परिणत भयो।

युवतीले युवकलाई धेरै विश्वास गर्ने अवस्था आएपछि युवकले युवतीको बैंक खाता मागे। युवतीको बैंक खातामा कहीँ अन्तैबाट रकम आउँथ्यो। अनि उनी उक्त रकम युवकलाई पठाइदिन्थिन्। पछि बिस्तारै युवतीको अनलाइन बैकिङ कारोबार प्रेमी आफैँले चलाउँदै आएका थिए।

तर, पछि प्रहरीले सम्पर्क गरेर उक्त रकम स्क्याम गरेर पठाउने गरेको भन्ने बताएपछि उनी झसङ्ग भइन्। सोमवार कार्यालयमा पार्सल पाउने नाममा ठगिएकी युवती र बैंक खाता दुरुपयोग भएकी युवतीका आफन्त कार्यालयमा आएका थिए।

पीडित र युवतीबीच ठगी भएको दुई लाख ४८ हजारमध्ये आधा रकम तत्काल उपलब्ध गराउने र बाँकी केही समयपछि (युवतीको खाताबाट जसको खातामा गएको छ, त्यो फेला पारेपछि) दिने सम्झौता भएको छ।

बैंक खाता दुरुपयोग भएकी युवतीले बैंक स्टेटमेन्ट निकालेर जसको खातामा रकम ट्रान्सफर भएको छ त्यही खातालाई विपक्षी बनाएर उजुरी दिएका छन्। यससँगै प्रहरीले अकाउन्ट उपलब्ध गराउने युवतीको बैंक स्टेटमेन्ट हेरेर अनुसन्धान अगाडि बढाउने योजना बनाएको छ।

पछिल्लो समय अनलाइनमा जोडिएको व्यक्तिको विश्वास गरेर बैंक अकाउन्ट उपलब्ध गराएर आफ्नोमा आएको रकम अर्कालाई पठाउँदा ठगीको आरोप भोग्नेहरू बढ्दै गइरहेका उपत्यका अपराध अनुसन्धान कार्यालयका साइबर पिल्लर प्रमुख डीएसपी लिलाराज डाँगी बताउँन्छन्।

उनी भन्छन्, ‘‘कसैले तपाईँको अकाउन्टमा रकम आउँछ त्यो रकम तपाईँले अर्को अकाउन्टममा पठाइदिनु भन्यो भने शंका गर्नुपर्ने अवस्था आएको छ। यदि कसैले रकम पठाउँदैछ भने किन कुन प्रयोजनका लागि पठाउन लागेको त्यो बुझेर मात्र कारोबार गर्नुपर्छ।’’