भारती मानन्धरको मुद्दा प्रधानन्यायाधीशले ‘हेर्न नमिल्ने’, अर्को पेशी कात्तिक १४ गते

काठमाडौं । आफ्नो श्रीमानको हत्यारा रिगल भनिने योगराज ढकाललाई सरकारको सिफारिसमा राष्ट्रपतिले आममाफी दिएकोविरुद्ध भारती मानन्धरले दायर गरेको मुद्दालाई प्रधानन्याधीशले ‘हेर्न नमिल्ने’ भनेपछि पेशी सरेको छ ।

प्रधानन्यायाधीश विश्वम्भरप्रसाद श्रेष्ठ, न्यायाधीशहरू आनन्दमोहन भट्टराई र कुमार रेग्मी सम्मिलित पूर्ण इजलासमा भएको सुनुवाइका क्रममा प्रधानन्यायाधीश श्रेष्ठले यसअघि यस्तै प्रकारको मुद्दा हेरिसकेकाले अहिले ‘हेर्न नमिल्ने’ भनेपछि पेशी सरेको हो ।

उक्त मुद्दाको अर्को पेशी आगामी कात्तिक १४ गतेका लागि तोकिएको छ ।

यसअघि असोज १८ गते अदालतले विपक्षीसँग सात दिनभित्र लिखित जवाफ दिन आदेश गरेको थियो ।

अदालतले सो रिट निवेदनको टुंगो नलागेसम्म निवेदक भारती शेर्पा र उनको परिवारका सदस्यलाई सुरक्षा प्रदान गर्नसमेत गृहमन्त्रालयलाई लेखेर पठाउन आदेश दिएको छ ।

न्यायाधीश शर्माले रिगल ढकालसँग जोडिएका सबै फैसला, निर्णयसहितको सक्कल मिसिलहरुसमेत मगाएको छ । अदालतले सो निवेदनलाई गम्भीर रूपमा लिएर महान्यायाधिवक्ता स्वयंलाई बहसमा उपस्थित हुनसमेत आदेश दिएको छ ।