आर्थिक चहलपहल बढाउन अन्तर्राष्ट्रिय विमानस्थल विराटनगरमा बनाउनुपर्ने माग

विराटनगर। कोसी प्रदेशको राजधानी विराटनगरमा अन्तर्राष्ट्रियस्तरको विमानस्थल निर्माण भए प्रदेशको पर्यटन प्रवर्द्धनमा मद्दत पुग्ने पर्यटन व्यवसायीहरूले बताएका छन् ।

विराटनगरमा आयोजित कार्यक्रममा सहभागी व्यवसायीले अन्तर्राष्ट्रिय विमानस्थल बन्न सके पर्यटन प्रवर्द्धनमा कोसेढुंगा साबित हुने बताएका हुन् ।

नेपाल पर्यटन फेडरेसनका अध्यक्ष रेवतबहादुर थापाले समग्र प्रदेशको उन्नतिका लागि प्रदेश राजधानी विराटनगरमा अन्तर्राष्ट्रियस्तरको विमानस्थल आवश्यक रहेको बताए । अन्तर्राष्ट्रिय विमानस्थल भए विदेशी पर्यटकको आगमन बढ्ने र त्यसले प्रदेशमा आर्थिक गतिविधि पनि वृद्धि हुने भन्दै थापाले पर्यटकीय क्षेत्रका बासिन्दा र पर्यटन व्यवसायी पनि लाभान्वित हुने बताए ।

अन्तर्राष्ट्रिय विमानस्थल हुँदा भारत, भुटान, भियतनाम, म्यानमार, बंगलादेश, मलेसिया, थाइल्यान्ड, इन्डोनेसिया, लाओस, चीनको ग्वाङचाउ लगायतका स्थानको यात्रा नजिक सहज हुने सहभागीहरूको भनाइ रहेको थियो ।