प्रधानमन्त्री प्रचण्डले गरे इन्दौर भ्रमण, मध्य प्रदेशका मुख्यमन्त्रीले गरेको रात्रिभोजमा सहभागी

नयाँ दिल्ली। भारत भ्रमणमा रहेका प्रधानमन्त्री पुष्पकमल दाहाल प्रचण्डले शुक्रबार भारतको मध्यप्रदेशस्थित इन्दौर भ्रमण गरेका छन्। इन्दौरको उज्जैनस्थित महाकालेश्वर मन्दिरमा पूजासमेत गरेका उनले त्यहाँको फोहोर व्यवस्थापन केन्द्रको अवलोकन गरेका छन्।

यस क्रममा इन्दौर नगर निगमको प्रमुख कार्यकारी अधिकृत हर्षिका सिंहले फोहोर व्यवस्थापन प्रक्रियाका बारेमा जानकारी गराए।
कुल एक अर्ब ५० करोड भारतीय रुपैयाँ लगानी रहेको सो केन्द्र सञ्चालनमा आएको एक वर्ष पुगेको छ। केन्द्रमा फोहोर व्यवस्थापनका लागि मासिक एक करोड १५ लाख भारतीय रुपैयाँ खर्च हुँदै आएको प्रमुख कार्यकारी अधिकृत सिंहले जानकारी दिए।

सो केन्द्रले फोहोरलाई व्यवस्थित गरेर आम्दानीसमेत गर्दै आएको छ। केन्द्रले मासिक तीन करोड ७५ लाख भारतीय रुपैयाँ आम्दानी गर्ने उनले जानकारी दिए। उक्त प्लान्टबाट ग्याससमेत उत्पादन हुँदै आएको छ। ती ग्यास इन्दौर सहरमा चल्ने सवारी साधनमा प्रयोग गरिँदै आइएको छ।

केन्द्रको अवलोकनपछि प्रधानमन्त्री दाहालले नेपालबाट प्राविधिक पठाइ फोहोर व्यवस्थापनको सफल अभ्यासको अध्ययन गर्न लगाउने पनि बताएका थिए।

स्वच्छ भारत अभियानअन्तर्गत इन्दौर नगर निगमले फोहोर व्यवस्थापनमा गरेको काम विश्वमै नमुनायोग्य मानिन्छ। भारतीय प्रधानमन्त्री नरेन्द्र मोदीले आफू निर्वाचित भएपछि स्वच्छ भारत अभियान सुरु गरेका थिए।

प्रधानमन्त्री प्रचण्ड केन्द्रको अवलोकन गर्न शुक्रबार बिहान भारतको राजधानी नयाँ दिल्लीबाट मध्य प्रदेशको इन्दौर पुगेका हुन्। इन्दौर विमानस्थलमा उनलाई मध्यप्रदेशका मुख्यमन्त्री शिवराज सिंह चौहानले स्वागत गरेका थिए।

प्रधानमन्त्री प्रचण्डको सम्मानमा शुक्रबार नै मुख्यमन्त्री चौहानले रात्रि भोजको आयोजना गरेका छन्। प्रधानमन्त्री दाहाल शनिबार स्वदेश फर्कने छन्। भारतीय प्रधानमन्त्री नरेन्द्र मोदीको निमन्त्रणामा उनी जेठ १७ मा भारत आएका हुन्।