ओली भन्छन्- राष्ट्रिय गान शब्दबाट सुरू हुनुपर्छ, अगाडिको प्याँ-प्याँ बज्ने धुन हटाउनुपर्छ

काठमाडौं ।  नेकपा (एमाले) का अध्यक्ष एवम् पूर्वप्रधानमन्त्री केपी शर्मा ओलीले राष्ट्रिय गान शब्दबाट सुरू हुनुपर्ने बताएका छन् । वीरगञ्जमा आयोजित एक कार्यक्रमलाई सम्बोधन गर्दै ओलीले यस्तो बताएका हुन् ।

राष्ट्रिय गान जहिल्यै पनि शब्दबाटै सुरू हुनुपर्ने मान्यता रहेको भएपनि नेपालको राष्ट्रिय गान धुनबाट सुरू हुने भन्दै उनले त्यो हटाउन सरकारलाई आग्रहसमेत गरे । ‘हामी राष्ट्रिय गानलाई सम्मान गर्छौँ । छातीमा हात लगाउने हाम्रो प्रचलन छैन, होइन र त्यो गरिरहन पर्दैन । एउटा कुराचाहिँ म सरकारलाई आग्रह गर्न चाहन्छु, राष्ट्रिय गानअगाडि प्याँ प्याँ प्याँ बज्ने केही धुन बजाउँछ, ट्याँ ट्याँ पारेर । सयौं थुङ्गा फूलका हामी भन्नेभन्दा अगाडिको धुन राष्ट्रिय धुन वा राष्ट्रिय गानमा पर्दैन । त्यो हटाइनुपर्दछ,’ उनले भने ।

अघि उनले भने, ‘अगाडि बजाइने बाजा राष्ट्रिय गानमा बजाइँदैन । म सरकारको ध्यानाकर्षण गराउन चाहन्छु, सरकारले यस्तो कुरामा ध्यान दिनुपर्छ । राष्ट्रिय गान भनेको राष्ट्रिय गानै नै हो । राष्ट्रिय गान शब्दबाट सुरू हुन्छ, शब्दमै अन्य हुन्छ । शब्दको धुनबाट सुरू हुन्छ, शब्दको धुनमा अन्त्य हुन्छ । त्योभन्दा अगाडि शृङ्गार-पटार गरेर अर्को म्यूजिक अगाडि हाल्ने, अर्को म्यूजिक पछाडि हाल्ने गरिँदैन ।’

यस्तै फरक प्रसङ्गमा उनले एमालेविरुद्ध विभिन्नखाले षड्यन्त्रहरू भइरहेको बताए । एमालेको नेतृत्वमा सरकार बन्ने बाटो रोक्न विभिन्न शक्तिहरू सक्रिय भएको उनले बताए । एमाले सरकारमा गयो भने धेरै विकास हुन्छ भनेर विरोधी शक्तिहरू रोक्न लागेका छन् । ‘हाम्रो सरकार बनेको भए यत्तिबेला पुलहरू बनिसक्थे, बाटाहरू बनिसक्थे । म प्रधानमन्त्री भएको बेला सुरू भएका परियोजनाहरू अहिले असफल भएर बसेका छन्,’ उनले भने ।