हौसिँदै राप्रपा : संघीयता खारेजी र हिन्दूराष्ट्र पुनर्स्थापनाको मुद्दा लिएर सडक ओर्लिँदै

काठमाडौं । राष्ट्रिय प्रजातन्त्र पार्टी(राप्रपा) ले संघीयता खारेजीको मुद्दालाई सडकबाटै ‘वार कि पार’ गर्ने भएको छ ।

राजसंस्था र हिन्दू राष्ट्र पुनर्स्थापनासहित राप्रपाले संघीयताको विरोध गर्दै आएको छ । संघीय संसद्‌मा समेत राप्रपाका सांसदले पार्टीका राजनीतिक एजेन्डा भन्दै आवाज उठाइरहेका छन् ।

पूर्वराजा ज्ञानेन्द्र शाहलाई झापामा भेटेपछि राप्रपा नेताहरू वर्तमान व्यवस्थाका विरुद्ध अझै आक्रामक बन्दै आएका छन् । उनीहरूले सडक र सदन दुवैतिरबाट संघीयता खारेजीको मुद्दालाई चर्कोरुपमा उठाउने बताएका छन् ।

राप्रपा केन्द्रीय कार्यसम्पादन समितिको बैठकमा समेत नेताहरूले यही विषयमा निर्णय गरेको राप्रपाले जनाएको छ । दुई दिनअघिको बैठकले ६ बुँदे निर्णय गरेको थियो ।

राप्रपाले निर्णय गरेको ६ बुँदामध्ये ५औं बुँदामा पार्टीको राजनीतिक लक्ष्यप्राप्तिका विषयमा आन्दोलन गर्ने आशय उल्लेख छ । साथै पार्टीले गर्ने आन्दोलन कस्तो हुने भन्ने निर्णयका लागि महामन्त्री डा. धवलशम्शेर राणा संयोजक रहेको तीन सदस्यीय समिति बनाएको छ । समितिमा अर्का महामन्त्री शरद पाठक र सहमहामन्त्री झनक प्याकुरेल सदस्य छन् ।

राप्रपाले गर्ने आन्दोलन सभ्य हुने तर परिणाम आउने खालको हुने नेताहरूको भनाइ छ । ‘राजसंस्था र हिन्दूराष्ट्रको पुनर्स्थापना र संघीयताको खारेजीलाई नै मुख्य एजेन्डा बनाइने छ,’ एक नेता भन्छन्, ‘राजनीतिक एजेण्डासँगै जनताका जनजीविकासँग सम्बन्धित विषयमा पनि पार्टी गम्भीर हुनेछ ।’

राप्रपाका अध्यक्ष राजेन्द्र लिङ्देनसहित बरिष्ठ नेता डा. प्रकाशचन्द्र लोहनी, उपाध्यक्ष रवीन्द्र मिश्र र महामन्त्री राणाले चैत ८ गते झापाको दमकमा पूर्वराजा ज्ञानेन्द्र शाहसँग भेट गरेका थिए ।

पूर्वराजासँगको भेटपछि उत्साही भएका अध्यक्ष लिङ्देनले राजसंस्था र हिन्दू राष्ट्र पुनर्स्थापनाको विषयमा ज्ञानेन्द्र शाहसँग मिलेर जाने बताएका थिए ।

बैठकमा पनि अध्यक्ष लिङ्देनले पूर्वराजासँगको भेटमा भएका कुराको ब्रिफिङ गरेका थिए । तर, राप्रपा प्रचण्ड सरकारमा सहभागी भएकोमा ज्ञानेन्द्रको असन्तुष्टि रहेको र अहिले सरकार छाडेपछि सम्बन्ध सुध्रिएको राप्रपाको बुझाइ छ ।

राप्रपासँग सम्बन्ध चिसिएपछि पूर्वराजा ज्ञानेन्द्र झापाकै व्यवसायी दुर्गा प्रसाईंसँग सार्वजनिक कार्यक्रममा देखिएका थिए । प्रसाईं एमालेका केन्द्रीय सदस्य थिए, पूर्वाराजा ज्ञानेन्द्रसँग नजिकिएपछि उनको पद गुमेको छ।