फरार सांसद कोइरीसहित तीन जनाले राष्ट्रपति उम्मेदवारलाई मत दिन नपाउने

काठमाडौं। निर्वाचन आयोगले राष्ट्रपति निर्वाचनमा आठ सय ८१ जनाले मात्रै मतदान गर्न पाउनेगरी मतदाता नामावली सार्वजनिक गरेको छ । मतदाता आठ सय ८४ भए पनि आयोगले ३ जनाले मत दिन नसक्ने जनाएको छ ।

आयोगका अनुसार प्रतिनिधिसभा सदस्य २७५, राष्ट्रियसभा सदस्य ५९ र प्रदेशसभा सदस्य ५५० गरी राष्ट्रपति निर्वाचनमा ८८४ जनाले मतदान गर्न पाउनुपर्ने हो । तर, सार्वजनिक गरेको सूचीमा महोत्तरी १ का सांसद लक्ष्मी कोइरीसमेत मनाङका टेकबहादुर गुरुङ र चितवन २ का रवि लामिछानेको नाम छैन ।

आयोगका अनुसार राष्ट्रिय स्वतन्त्र पार्टीका सभापतिसमेत रहेका लामिछाने पदमुक्त,नेपाली कांग्रेसबाट मनाङबाट निर्वाचित टेकबहादुर गुरुङ निलम्बन र एमालेबाट निर्वाचित लक्ष्मी कोईरी फरार रहेको कारण यीनको मतदानमा सहभागिता हुँदैन ।

राष्ट्रपति तथा उपराष्ट्रपति निर्वाचन अधिकृतको कार्यालयले बुधबार आठ सय ८१ जनाको नामावली सार्वजनिक गरेको हो । यसमा संघीय संसदका ३३१ र प्रदेश सभाका ५५० जनाको नाम समावेश छ । राष्ट्रपतिको निर्वाचनमा संघीय सांसद र प्रदेश सभा सदस्यहरूले भाग लिन पाउँछन्।

राष्ट्रपतिको पदको लागि फागुन १३ गते मनोनयन दर्ता र २५ गते निर्वाचन हुँदैछ । राष्ट्रपति निर्वाचन तालिकाअनुसार निर्वाचन आयोगले दाबी, विरोध र उजुरीउपर छानबिन फागुन ११ र १२ गते गर्नेछ । अन्तिम मतदाता नामावली फागुन १२ गते नै प्रकाशन गर्ने आयोगको कार्यतालिका छ ।

राष्ट्रपतिका लागि मनोनयन दर्ता र निर्वाचन बानेश्वरस्थित संघीय संसद् भवनमा हुनेछ । आयोगले निर्वाचन अधिकृतको कार्यालयसमेत त्यहाँ स्थापना गरिसकेको छ । निर्वाचनका लागि न्याय परिषद्को परामर्शमा उच्च अदालत पाटनका न्यायाधीश महेश शर्मा पौड्याल निर्वाचन अधिकृत तोकिएका छन् ।