सुदूरपश्चिममा प्रहरी प्रमुख फेरिएपछि सक्रियता बढ्यो, एक महिनामा ११६ जना प्रतिवादी पक्राउ

धनगढी। सुदूरपश्चिम प्रदेशमा एक महिनामा विभिन्न मुद्दाका ११६ जना प्रतिवादी पक्राउ परेका छन् । सुदूरपश्चिम प्रदेश प्रहरी कार्यालयले सार्वजनिक गरेको एक महिने कार्य प्रगति विवरणमा सवारी साधन, लागुऔषध लगायतका मुद्दामा ११६ जना व्यक्ति पक्राउ परेको जानकारी दिइएको हो ।

प्रदेश प्रहरी प्रमुख प्रहरी नायब महानिरीक्षक अशोक सिंहले आफू आएको पुस १० गतेदेखि हालसम्म कैलालीबाट २३ केजी २५ ग्राम चरेश, १० ग्राम गाँजा, १२८ नाइट्रोभेट, ८ स्यास्मो, ६९ स्पास, १ कोरेक्स, १४५ ग्राम ९७७ मिलिग्राम हिरोइनसहित ८२ जना मानिस पक्राउ परेको जानकारी दिएका छन् ।

यस्तै, कञ्चनपुरबाट १७ किलो ४६१ ग्राम चरेश, ८८ ग्राम ७ सय ५५ मिलिग्राम हिरोइन, ९४ फेनार्गन, ९३ रेक्सोजेसिक, ७९ डाइजापाम र १० नाइट्राभेटसहित ३१ जना पक्राउ परेको प्रदेश प्रहरी प्रमुख सिंहले जानकारी दिए । यस्तै, ५ सय १७ ग्राम चरेशसहित ३ जना पक्राउ परेका छन् ।

यस्तै, लागुऔषधमा चरेश ४१ किलो ३ दशमलव ६९ ग्राम, गाँजा १० ग्राम, नाइट्राभेट १३८ ट्याब्लेट, स्यास्मा ८ ट्याब्लेट, स्पास ६९ ट्याब्लेट, कोरेक्स १ ट्याब्लेट, हेरोइन् २३५ ग्राम ४५ मिलिग्राम, फेनार्गन ९४ ट्याब्लेट, रेक्सोजेसिक ९३ ट्याव्लेट, ७९ एम्पुल डाईजापाम बरामद गरिएको छ ।

सुदूरपश्चिम प्रदेशमा सुरक्षा व्यवस्थापन चुस्त दुरुस्त मिलाउन सिमानाका क्षेत्र तथा प्रदेशका जिल्लामा सक्रियरूपमा प्रहरी परिचालन गरिएको छ ।

प्रदेशका सिमानाकाबाट चोरी लागुऔषधका घटना बढी हुने गरेको बताउँदै अभियान नै सञ्चालन गरिरहेको र चोरी, तस्करी, लागुऔषध, अपराधसम्बन्धी घटनाको न्यूनीकरणका लागी समन्वय गरिरहेको डीआईजी सिंहले बताए । यस्तै, हातहतियारसहित वन्यजन्तु चोरी निकासी र अवैध काठसहित अछाम, बाजुरा र कैलालीबाट केही व्यक्ति पक्राउ परेको बताएका छन् ।