काठमाडाैं | सत्तारुढ गठबन्धनको बैठक निष्कर्षबिहीन भएको छ । सरकार गठनबारे छलफल गर्न प्रधानमन्त्रीको सरकारी निवास बालुवाटारमा शनिवार अपराह्न बसेको बैठकमा सहमति नजुटेको हो ।
उक्त बैठकमा नेपाली कांग्रेस, नेकपा माओवादी केन्द्र, नेकपा एकीकृत समाजवादी र राष्ट्रिय जनमोर्चाका शीर्ष नेता सहभागी थिए ।
बैठकमा सहभागी एक नेताका अनुसार गठबन्धनमा रहेका प्रमुख दल नेपाली कांग्रेस र नेकपा माओवादी केन्द्रले सरकारको नेतृत्वमा दाबी कायमै राखेपछि सहमति नजुटेको हो ।
आज सहमति नभएकाले आइतवार पुनः छलफल गर्ने गरी आजको बैठक सकिएको सरकारका प्रवक्ता एवं सञ्चार तथा सूचना प्रविधिमन्त्री ज्ञानेन्द्रबहादुर कार्कीले जानकारी दिए ।
उनले आइतवारकाे बैठकमा सहमति हुने र सरकार गठबन्धनकै बन्ने बताए ।
सरकार गठनका लागि दाबी पेश गर्न राष्ट्रपति विद्यादेवी भण्डारीले दिएको समय पुस १० गते अपरान्ह ५ बजे सकिँदैछ ।
त्यसअघि नै कुनै प्रतिनिधिसभा सदस्यले आफ्नो पक्षमा बहुमत पुर्याएर राष्ट्रपतिसमक्ष दाबी पेश गर्नुपर्ने भएकाले सत्तारुढ दलले छलफललाई तीव्रता दिएको छ ।
Facebook Comment
Comment