मेस्सीले तत्काल अन्तर्राष्ट्रिय खेलबाट सन्यास नलिने

काठमाडौं। विश्वकपपछि सन्यास लिने घोषणा गरेका अर्जेन्टिनाका कप्तान लिओनल मेस्सीले आफ्नो घोषणा फिर्ता लिएका छन्। विश्वविजेता भएपछि प्रतिक्रिया दिँदै उनले तत्काल अन्तर्राष्ट्रिय फुटबलबाट सन्यास नलिने बताएका छन्।

यसअघि सन् २०१६ मै अन्तर्राष्ट्रिय फुटबलबाट सन्यास लिएका मेस्सीले त्यहाँका राष्ट्रपतिको आग्रहमा सन्यास फिर्ता लिएर पुनः खेलेका हुन्।

अहिले पुन अन्तर्राष्ट्रिय खेलबाट सन्यास नलिने बताएका उनले आफू अर्जेन्टिनाको जर्सीमा अझै खेल्न चाहेको उनको भनाइ छ। यसअघि मेस्सीले आफ्ना लागि कतार विश्व कप नै अन्तिम विश्व कप भएको बताइसकेका छन्।

मेस्सीको कप्तानीमा अर्जेन्टिनाले कतार विश्व कपको उपाधि जितेको छ। गएराति कतारको लुसेल मैदानमा भएको फाइनलमा फ्रान्स पेनाल्टी सुटआउटमा ४–२ गोलले पराजित भयो।

पाँचौँ पटक विश्व कप खेलेर उपाधि जिताएका मेस्सीले विश्व कपमा सर्वाधिक खेल खेल्ने खेलाडीको कीर्तिमान समेत बनाएका छन्। फ्रान्ससँगको फाइनल खेलमा उनले विश्व कपमा आफ्नो २६औँ खेल खेले।

अहिलेसम्म विश्व कपमा २६औँ खेल खेल्ने मेस्सी एक्ला खेलाडी हुन्।