माओवादीका मान्छेले कसरी रुखमा भोट हाल्ने भन्ने अब ‘डेटएक्सपायर’ भयो : प्रचण्ड

काठमाडाैँ । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले प्रतिक्रान्तिकारी प्रवृत्ति अझै सलबलाइरहेकाे बताएका छन् । मंगलबार ललितपुरमा आयाेजित कार्यकर्ता भेलालाई सम्बाेधन गर्दै प्रचण्डले यस्ताे बताएका हुन् ।

‘प्राप्त उपलब्धिलाई सिद्ध्याउन खाेज्ने प्रवृत्ति अझै बाँकी नै छ, प्रतिक्रान्तिकारीहरू अझै बाँकी छन्,’ उनले भने, ‘हामीले संघीय लाेकतन्त्रिक गणतन्त्रकाे रक्षाका लागि गठबन्धन गरेका हाैँ । हामी याे गर्छाैँ नै ।’

गाेरुगाडावालाहरूले अझै प्रतिगमन नै चाहने उनकाे आराेप थियाे । एमाले अध्यक्ष केपी शर्मा ओलीप्रति इङ्गित गर्दै उनले भने, ‘गाेरुगाडावालाहरू राजावादीहरूसँग गठबन्धन गरेर जाँदैछन् । उनीहरू त्याे तालमेल मात्रै भन्छन्, तर त्यसाे हाेइन गठबन्धन नै हाे ।’ तर, आफूहरू संविधान, समानुपातिक-समावेशी जाेगाउने लक्ष्यका साथ गठबन्धनमा रहेकाे उनले जिकिर गरे, भने— ‘देशलाई बचाउने, लाेकतन्त्रलाई बचाउने र संघीयतालाई बचाउने हाे । हामी प्राप्त उपलब्धिलाई नै जाेगाउने हाे ।’

प्रचण्डले गठबन्धन दलहरूले आपसमा रमाएर, खुसी भएर भाेट हाल्नुपर्ने बताए । ‘माओवादीका मान्छेले कसरी रुखमा भाेट हाल्ने भन्ने, कांग्रेसका साथीहरूले हँसिया हथाैडामा कसरी भाेट हाल्ने भन्ने क्रम चलिरहेकै छ,’ उनले भने, ‘अबचाहिँ एकले अर्कालाई रमाएर भाेट हाल्नुपर्‍याे नि ! खुसी भएर हाल्नुपर्‍याे । अब कसरी भाेट हाल्ने भन्ने कुरा डेटएक्सपायर भयाे । याे बुझाैँ ।’

उनले अबकाे सरकार गठबन्धनकै बन्ने ठाेकुवासमेत गरे ।