काठमाडौं। सहिद स्मारक सि डिभिजन लिग छनोटमा मसुरिया फूटबल एकेडेमीले विजयी सुरुवात गरेको छ। सातदोबाटोस्थित एन्फा कम्प्लेक्समा बिहीबार भएको उद्घाटन खेलमा मसुरियाले प्रगति युथ क्लबलाई ४–० गोलअन्तरले पराजित गरेको हो ।
मसुरियाको लागि अभिषेक भुजेलले २ र जीवन चौधरीले १ गोल गरे । अभिषेकले खेलको २६औं मिनेटमा र इन्जुरी समय गोल गरे भने जीवनले ८९औं मनेटमा गोल गरेका थिए । खेलको नवौं मिनेटमा प्रगतिले आत्मघाती गोल व्यहोरेको थियोे ।
यस्तै, अर्को खेलमा समूह ‘बी’ को फर्साटिकर युवा क्लब र ग्राम निर्माण बन्धु मण्डल क्लब दिउँसो साढे ३ बजे आमने–सामने हुनेछन् । अखिल नेपाल फुटबल संघ एन्फाले सहभागी ६२ क्लबलाई २० समूहमा विभाजन गरेको छ ।
हरेक समूहको विजेताले नकआउट चरणमा स्थान पक्का गर्नेछ । नकआउट चरण पनि २ समूहमा विभाजन गरिएको छ । सो समूहका विजेताहरू ‘सी’ डिभिजन लिगको लागि छनोट हुनुका साथै फाइनलमा प्रतिस्पर्धा गर्नेछन् । फाइनल खेल भने मंसिर १ गते हुनेछ ।
Facebook Comment
Comment