पाकिस्तानलाई हराउँदै श्रीलंकाले ८ वर्षपछि जित्यो उपाधि

काठमाडौं । पाकिस्तानलाई हराउँदै श्रीलंकाले एसिया कप क्रिकेटको उपाधि जितेको छ ।

दुबईमा आइतबार राति फाइनलमा पाकिस्तानलाई २३ रनले हराउँदै श्रीलंका एसियाको च्याम्पियन बनेको हो ।

१ सय ७१ रनको लक्ष्य पछ्याएको पाकिस्तानलाई श्रीलंकाले अन्तिम बलमा १४७ रनमा अलआउट गरेको थियो ।

पाकिस्तानका लागि मोहमद रिजवानले ५५ रन बनाए पनि हार टार्न सकेनन् ।

इफ्तिखर अहमेदले ३२ तथा हरिस राउफले १३ रन बनाउनुवाहेक अन्य खेलाडीले दोहोरो अंकको रन जोड्न सकेनन् ।

श्रीलंकाका प्रमोद मधुसनले ४ तथा वानिन्दु हसरंगा डी सिल्भाले ३ विकेट लिए । चामिका करुनारत्नेले २ विकेट लिए ।

त्यसअघि टस हारेर पहिले ब्याटिङ गरेको श्रीलंकाले २० ओभरमा ६ विकेट गुमाएर १ सय ७० रन बनाएको थियो ।

श्रीलंकाका लागि भानुका राजपाक्षेले अविजित रहदै ७१ रनको इनिङ्स खेले । यस्तै वानिन्दु हसरंगाले ३६ तथा धनन्जय डी सिल्भाले २८ रन बनाए ।

पाकिस्तानका हरिस राउफले ३ विकेट लिए । श्रीलंका छैटौं पटक एसिया कपको उपाधि जित्न सफल भएको छ । तर यो उपाधि उसले आठ वर्षपछि जितेको हो ।

यसअघि सन् २०१४ मा बंगलादेशमा भएको एसिया कपमा श्रीलंकाले पाकिस्तानलाई नै हराएर उपाधि जितेको थियो ।